МУС ужо збірае інфармацыю пра тых, хто перасякае мяжу з РФ?
Інфармацыю пра беларусаў, якія стаяць на міграцыйным уліку, здаецца, таксама.
Чарговы апдэйт «дармаедскіх» правілаў (ад 1 красавіка база абнаўляецца штомесяц, а не раз на квартал) прымусіў нас звярнуць увагу на важную змену, якая дзейнічае ўжо трэці месяц.
Пастанова Саўміна № 53 ад 25 студзеня 2024 года не толькі загадвае адносіць да дармаедаў тых беспрацоўных агароднікаў і бацькоў дзяцей да 7 гадоў / траіх непаўналетніх дзяцей / дзіцяці-інваліда, хто адсутнічаў у Беларусі 30+ дзён цягам квартала, але і робіць больш жорсткім кантроль за перасячэннем мяжы.
Так, улады маюць намер адсочваць у тым ліку тых, хто выехаў з краіны праз Расію і тых, хто ў Расіі жыве. Для гэтага ў Палажэнне аб парадку аднясення працаздольных грамадзян да не занятых у эканоміцы ўключылі такі пункт:
«Міністэрства ўнутраных спраў на падставе інфармацыі, дадзенай Міністэрствам унутраных спраў Расійскай Федэрацыі, штомесяц да 20-га чысла месяца, які папярэднічае фармаванню Дзяржаўным памежным камітэтам звестак у адпаведнасці з часткай чацвёртай гэтага пункта, перадае ў Дзяржаўны памежны камітэт інфармацыю аб грамадзянах Рэспублікі Беларусь, якія выехалі з тэрыторыі Расійскай Федэрацыі і заехалі на тэрыторыю Расійскай Федэрацыі праз пункты пропуску дзяржаўнай мяжы Расійскай Федэрацыі».
Дзяржпагранкамітэт, у сваю чаргу, штомесяц да 5-га чысла перадае Мінпрацы і сацабароны звесткі пра грамадзян, якія выехалі на 30+ дзён запар па-за межы не толькі Беларусі, але і Расіі.
Акрамя гэтага, МУС штоквартальна перадае ў Мінпрацы інфармацыю пра грамадзян, якія аформілі выезд на ПМЖ, і тых, хто знаходзіцца на міграцыйным уліку ў Расіі.
Апошнюю — таксама «на падставе інфармацыі, дадзенай Міністэрствам унутраных спраў Расійскай Федэрацыі».
Гэтыя палажэнні набылі адразу пасля апублікавання 53-й пастановы, то-бок 1 лютага.
Пастанова абавязвае МУС РБ перадаваць даныя ў іншыя дзяржорганы, яна не рэгламентуе дзеянняў МУС адносна збору гэтых даных. Незразумела, ад якога часу і ў якім аб’ёме расійскае МУС перадае інфармацыю пра беларусаў, што з’ехалі/заехалі праз РФ або там аселых (калі перадае). Аднак не выключана, што гэта новая прыступка на шляху да татальнага кантролю над міграцыяй грамадзян.
Читать на dev.by