У Расіі будуць уручаць электронныя позвы — і забараняць выезд з краіны пасля ўручэння
Дзярждума Расіі прыняла законапраект пра стварэнне адзінага электроннага рэестра воінскага ўліку, а таксама папраўкі пра новыя спосабы апавяшчэння прызыўнікоў, піша vc.ru. Дагэтуль позвы ўручалі толькі ў папяровым выглядзе, асабіста і пад роспіс, але цяпер іх таксама будуць дасылаць праз Дзяржпаслугі або лічыць уручанымі аўтаматычна пасля ўнясення даных у спецыяльны рэестр.
Папраўкі ўнеслі 10 красавіка ў законапраект, які пачыналі разглядаць у 2018 годзе, але адклалі. Яны набудуць моц адразу пасля апублікавання. Перад гэтым неабходнае ўхваленне Савета Федэрацыі (верхняй палаты расійскага парламента) і подпіс Уладзіміра Пуціна.
Сутнасць паправак у наступным. З’явяцца электронныя позвы — іх будуць рассылаць праз партал «Дзяржпаслугі». Такая позва будзе лічыцца ўручанай ад моманту з’яўлення ў асабістым кабінеце карыстальніка. «Калі вы не ўбачыце яе ў асабістым кабінеце — гэта вашыя праблемы», — заявіў дэпутат Андрэй Лугавы. Таксама ўручаць позвы будуць праз МФЦ і заказным лістом.
Будзе створаны адзіны электронны рэестр ваеннаабавязаных, які змяшчае асабістыя даныя прызыўнікоў — уключаючы месца пражывання і ваенную спецыяльнасць. Пастаўляць даныя для яго будуць ФНС, МУС, ЦВК, Міністэрства асветы, суды ды іншыя арганізацыі. Атрымаць доступ да рэестра можна будзе праз «Дзяржпаслугі» або МФЦ.
Калі позву не ўдалося ўручыць, яна будзе лічыцца атрыманай праз 7 дзён пасля з’яўлення даных у рэестры. Пасля ўручэння позвы трэба на працягу 20 дзён прыйсці ў ваенкамат. Датуль прызыўніку забаронены выезд з Расіі.
Праз 20 дзён, у якой бы форме ні ўручылі позву, уводзяцца дадатковыя абмежаванні: забарона на рэгістрацыю ІП, на пастаноўку на ўлік у падатковай службе, кіраванне, атрыманне крэдытаў ды іншыя. Таксама няможна станавіцца самазанятым і здзяйсняць угоды з нерухомасцю. Рэгіянальныя ўлады змогуць уводзіць іншыя абмежаванні, напрыклад, адмаўляць у льготах.
Законапраект не будзе распаўсюджвацца на вясновы прызыў, які будзе доўжыцца ад 1 красавіка да 15 ліпеня. Тэрміны восеньскага прызыву — ад 1 кастрычніка да 31 снежня.
У Крамлі выключаюць паніку і новаю хвалю эміграцыі праз электронныя позвы: «Бо гэта не звязана з мабілізацыяй, гэта звязана з вайсковым улікам», — растлумачыў РБК прэс-сакратар Пуціна Дзмітрый Пяскоў.
Читать на dev.by