У Расіі хочуць стварыць адзіны цэнтр сертыфікацыі айцішнікаў
Мінлічбы Расіі і сэрвіс пошуку працы HeadHunter абмяркоўваюць стварэнне адзінага цэнтра для сертыфікацыі ІТ-спецыялістаў. Пра гэта піша «Камерсант» са спасылкай на ліст дырэктаркі Дэпартамента развіцця лічбавых кампетэнцый і адукацыі Мінлічбы Таццяны Трубнікавай ад 23 кастрычніка, накіраваны шэрагу профільных ІТ-кампаній і галіновых асацыяцый.
Незалежная тэхналагічная пляцоўка, якая будзе ўтрымліваць інфармацыю аб стане рынку працы ІТ-спецыялістаў, можа быць створаная на базе платформы hh.ru. Таксама на яе аснове могуць стварыць «сістэму добраахвотнага пацвярджэння навыкаў у ІТ-галіне з улікам розных узроўняў кампетэнцый, незалежна ад наяўнасці профільнай адукацыі».
Абмеркаванне гэтай ініцыятывы можа адбыцца 27 кастрычніка. Пры гэтым рашэнне аб выбары канчатковай тэхналагічнай пляцоўкі для сертыфікацыі пакуль не прынятае. «З ініцыятывай выступіў HeadHunter, але выніковага рашэння наконт рэалізацыі праекта яшчэ няма», — сказалі выданню ў Мінлічбы. Але кампанія «ўжо сфармавала гатовую карту кампетэнцый, апісала і верыфікавала 46 ІТ-прафесій і 310 навыкаў у іх, праверыла даныя па заробках», таму падыходзіць для гэтага праекта.
Ідэя аб стварэнні расійскай адзінай сістэмы сертыфікацыі супрацоўнікаў абмяркоўваецца ад верасня. Пасля пачатку вайны ва Украіне замежныя цэнтры сертыфікацыі (Oracle, Red Hat, VMware і іншыя) сышлі з расійскага рынку. Наяўнасць дакументаў, якія пацвярджаюць навыкі ў працы з прадуктамі кампаній, давала канкурэнтную перавагу пры працаўладкаванні.
Читать на dev.by