У Сенаце ЗША запатрабавалі расследаваць зрыў Маскам украінскай аперацыі ў Крыме
Сенатарка Элізабэт Уорэн запатрабавала правесці расследаванне ў дачыненні да SpaceX пасля таго, як гендырэктар кампаніі Ілан Маск прызнаў, што перашкодзіў Украіне правесці атаку на расійскі флот на Чорным моры. Гаворка ідзе аб адмове бізнэсоўца ўключыць пакрыццё спадарожнікавага інтэрнэт-сэрвісу Starlink у зоне аперацыі на просьбу ўкраінскіх уладаў.
«Кангрэс мае расследаваць, што тут адбылося, і ці ёсць у нас адэкватныя інструменты, каб гарантаваць, што замежную палітыку праводзіць урад, а не адзін мільярдэр», — цытуе сенатарку-дэмакратку ад Масачусетса Bloomberg.
Чакаецца, што Маск будзе прысутнічаць у ліку іншых лідараў ІТ-індустрыі на закрытай сустрэчы з сенатарамі ў Капітоліі 13 верасня.
Уорэн з’яўляецца сяброўкай камітэта Сената ЗША па ўзброеных сілах. Яна таксама заклікала Мінабароны краіны перагледзець свае кантракты з кампаніяй. Старшыня камітэта Джэк Рыд таксама выказаў занепакоенасць гэтым пытаннем, паколькі касмічныя спадарожнікі звычайна знаходзяцца пад кантролем уладаў, а рашэнні наконт іх — у кампетэнцыі прэзідэнта.
Ён дадаў, што SpaceX удалося знізіць кошт касмічных запускаў — у тым ліку запускаў з мэтай забеспячэння нацбяспекі. Але пры гэтым «апошняе слова ў пытанні нацыянальнай бяспекі не мусіць быць» за Маскам, перакананы Рыд.
На мінулым тыдні Маск пацвердзіў, што адмовіў украінскім уладам у экстраннай просьбе ўключыць Starlink у раёне Крыма. Напярэдадні фрагмент пра гэта з кнігі Уолтара Айзексана пра мільярдэра апублікаваў тэлеканал CNN.
Пазней Маск заявіў пра сваю прыхільнасць інтарэсам ЗША: «Я грамадзянін ЗША, і ў мяне толькі адзін пашпарт. Што б ні здарылася, я буду змагацца і памру за Амерыку. Кангрэс Злучаных Штатаў не абвяшчаў вайны Расіі. Здраднік тут той, хто называе мяне такім».
Читать на dev.by