Аддзел навін world 7 ліпеня 2025, 12:31

У ЗША сфармаваліся два рынкі працы

Амерыканцы жывуць у двух паралельных эканамічных рэальнасцях: тыя, у каго ёсць праца, з высокай верагоднасцю яе захаваюць, а беспрацоўным усё складаней знайсці новае месца, піша Axios.

Пакінуць каментарый

Амерыканцы жывуць у двух паралельных эканамічных рэальнасцях: тыя, у каго ёсць праца, з высокай верагоднасцю яе захаваюць, а беспрацоўным усё складаней знайсці новае месца, піша Axios.

Праблема ў тым, што і наём, і звальненні на рынку працы сталі адбывацца радзей. Звальненні ў прыватным сектары на гістарычным мінімуме. Але для тых, хто не мае працы, і незадаволеных бягучай, перспектывы змрочныя.

Паводле афіцыйных дадзеных, ў чэрвені колькасць занятых у эканоміцы вырасла на 147 тысяч — больш, чым чакалася. Але як падлічылі эксперты, 85% гэтых працоўных месцаў прыйшліся усяго на два сектары — адукацыя і ахова здароўя. Тэмпы найму ў іншых сектарах, уключаючы прафесійныя і дзелавыя паслугі (гэта значыць офісную працу), практычна не змяніліся.

Трэнд на «замарозку» на рынку працы назіраецца ў эканоміцы ЗША ўжо некалькі гадоў. Яго пагоршыла распаўсюджванне ШІ, пры дапамозе якога працадаўцы спрабуюць павысіць прадукцыйнасць наяўных супрацоўнікаў замест таго, каб набіраць больш людзей.

У маі колькасць звальненняў скарацілася на 188 тысяч — гэта каля мінімуму за апошнія дзесяцігоддзі. Але прасеў і наём на новыя працоўныя месцы — на 112 тысяч, што значна ніжэй дапандэмічных узроўняў. Колькасць людзей, якія працягваюць атрымліваць дапамогу па беспрацоўі, знаходзіцца на максімуме з 2021 года, гэта значыць знайсці працу беспрацоўным складаней.

«Сітуацыя на рынку працы складаная — ён не руйнуецца, але і дынамікі ў першым паўгоддзі амаль не было — мала найму і звальненняў», — кажуць эканамісты ADP.

«Многія працадаўцы не спяшаюцца звальняць, пакуль рэцэсія не падыдзе зусім блізка — занадта праблематычна было знайсці адпаведных спецыялістаў», — пішуць стратэгі J.P. Morgan Asset Management

Калі глядзець на колькасць звольненых амерыканцаў, усё выглядае вельмі нядрэнна. Аднак лічбы па найму — ледзь не горшыя за апошнія гады — знішчаюць аптымізм. Пытанне ў тым, ці зрушыцца рынак з мёртвай кропкі, і калі так, то ў які бок: росту найму ці звальненняў.