Ва Узбекістане 2+ тысячы чыноўнікаў замяняюць на ШІ

Згодна з дакументам «Аб мерах па аптымізацыі колькасці кіраўнічых пасад выканаўчых органаў дзяржаўнай улады за кошт шырокага ўкаранення лічбавізацыі», да 1 лістапада ў сістэме будзе скарочана 2141 штатная адзінка.

Больш за ўсё скарачэнне закране Падатковы камітэт — 498 адзінак, Міністэрства воднай гаспадаркі — 224, сельскай гаспадаркі — 200, юстыцыі — 197, экалогіі — 176, а таксама занятасці і скарачэння беднасці — 163 штатныя адзінкі. Работнікам, якія трапілі пад скарачэнне, будуць дапамагаць нанова працаўладкавацца Мінзанятасці і Федэрацыя прафсаюзаў Узбекістана.

Рашэнне прынята ў рамках маштабных рэформаў па мадэрнізацыі дзяржкіравання. Яны прадугледжваюць укараненне сучасных тэхналогій і рынкавых механізмаў у дзяржорганы, а таксама прыцягненне прыватнага сектара да выканання дзяржаўных функцый. Гэта павінна павысіць эфектыўнасць выканаўчых органаў і знізіць выдаткі. Адміністрацыйная рэформа ва Узбекістане пачалася ў снежні 2022 года, па ёй планавалася скараціць штат усіх міністэрстваў на 30%.