З хатняй ежай і мудрымі парадамі: у Японіі набірае папулярнасць сэрвіс па арэндзе бабуль

Зараз у ім прадстаўлена каля 100 жанчын ва ўзросце ад 64 да 90 гадоў. Яны могуць, напрыклад, дапамагчы з хатнімі справамі ці падзяліцца жыццёвым досведам. На сайце сэрвісу адзначаецца, што ад кліентаў паступаюць самыя розныя запыты: ад навучыць гатаваць ежу, пасядзець з дзіцем, дапамагчы вырашыць сямейныя спрэчкі ці даць псіхалагічную падтрымку пасля расстання з бойфрэндам да напісаць нешта прыгожым почыркам ці дапамагчы прасачыць сацыяльныя змены ў краіне за мінулыя гады.

Сэрвіс быў запушчаны яшчэ ў 2011 годзе, але ўзляцеў на фоне росту кошту жыцця ў Японіі, за якім не паспяваюць пенсіі. Каб звесці канцы з канцамі, пенсіянеры шукаюць дадатковыя крыніцы даходу. Паводле дадзеных японскага статыстычнага бюро, у краіне працуе прыкладна кожны чацвёрты пенсіянер. Акрамя таго, сэрвісы кшталту OK Obaachan забяспечваюць сацыялізацыю пенсіянерам, якія ў старасці часта застаюцца ў самоце.

Сэрвіс распрацавала кампанія Client Partners, якая дапамагае жанчынам з рознымі навыкамі з пошукам працы. У яе ёсць аналагічныя сэрвісы па арэндзе сяброў і членаў сям'і (таксама для жанчын).

Рэакцыі ў інтэрнэце на OK Obaachan розныя. Адны яго вітаюць, бо ён дае людзям адчуванне, што яны патрэбныя, і часам бывае карысна атрымаць параду ад мудрага чужога чалавека. Іншыя настроены скептычна з-за ўзросту — і здароўя — пенсіянераў, якія прапануюць свае паслугі, і таму, што якасць гэтых паслуг будзе латарэяй (як, увогуле, у любым сэрвісе такога фармату).