Вайб-кодынг змяніў погляд інвестараў на ІТ-стартапераў. Цяпер ад іх чакаюць іншыя скілы

Традыцыйна інвестары аддавалі перавагу стартапам з заснавальнікамі, якія валодаюць навыкамі праграмавання. Але цяпер пісаць код — дакладней, даваць каманды ШІ, які піша код, — могуць нават людзі без ІТ-бэкграўнду. Таму ўсё больш значэнне набываюць веданне прадметнай вобласці, дзелавая хватка і валоданне ШІ-інструментамі.

Партнёры венчурнага фонду Oxx адзначаюць, што для фаўндараў цяпер важней добра разбірацца ў той галіне, у якой яны працуюць, і здольнасць дапаўняць яе ІТ-прадуктам, асабліва на фоне паглыблення спецыялізацыі бізнесу. Напрыклад, бухгалтар з 20-гадовым досведам, хутчэй за ўсё, мае велізарны багаж ведаў, якія можна ператварыць у крыніцу даходу.

Іншыя інвестары адзначаюць, што стартапы з тэхнічнымі фаўндарамі заўсёды будуць запатрабаванымі. Аднак чаканні інвестараў ад іх у эпоху вайб-кодынгу моцна змяняюцца. Замест таго, каб шмат пісаць код і ствараць з нуля класны функцыянал, асноўную частку часу тэхнічныя каманды будуць прысвячаць павелічэнню ўцягнутасці, прывабнасці прадукту, зніжэнню выдаткаў і павышэнню аддачы ад укладанняў для інвестараў.

Калі на ранніх стадыях фаўндары могуць цягнуць тэхнічную частку прадукту за кошт вайб-кодынгу, то на больш позніх стадыях інвестары таксама чакаюць ад стартапаў пэўнага «ўзроўню ўстойлівасці і маштабавальнасці» ў плане распрацоўкі софта, адзначаюць у Dawn Capital: «Калі мы інвестуем у ПЗ для бізнесу, для нас важней, які прадукт вы распрацавалі і як вырашаеце бізнес-праблему», — адзначаюць там.

Акрамя таго, змяняецца самае разуменне таго, хто такі «айцішны» фаўндар. Звычайна ім лічылі таго, хто ўмее пісаць, правяраць і разгортваць код. Цяпер кодынг бярэ на сябе ШІ, а ў фаўндарах інвестары шукаюць «майндсет архітэктара» — гэта значыць наяўнасць сістэмнага мыслення і комплекснага погляду на рэчы, кажуць інвестары BGV.

У Oxx дадаюць, што надзвычай зацікаўлены ў ІТ-фаўндарах, якія на «ты» з ШІ, асабліва на ранніх стадыях, бо тэхналогія можа дапамагчы стартапам не толькі з кодам, але і з пошукам product-market fit — стварэннем прадукту, які адпавядае запытам рынку.