Алеся Чапкевич world 10 лістапада 2025, 16:08

«Вамі вельмі лёгка маніпуляваць»: гендырэктар Perplexity выказаўся аб аматарах ШІ-кампаньёнаў

Генеральны дырэктар Perplexity Аравінд Шрынівас занепакоены імклівым ростам папулярнасці ШІ-кампаньёнаў і лічыць іх «небяспечнымі». Пра гэта ён казаў на нядаўнім мерапрыемстве ў Чыкагскім універсітэце. Гаворка ішла не пра асістэнтаў для кодынгу, а пра галасавыя і анімэшныя чат-боты, якія даюць карыстальнікам эмацыйную падтрымку і зносіны.

Пакінуць каментарый

Генеральны дырэктар Perplexity Аравінд Шрынівас занепакоены імклівым ростам папулярнасці ШІ-кампаньёнаў і лічыць іх «небяспечнымі». Пра гэта ён казаў на нядаўнім мерапрыемстве ў Чыкагскім універсітэце. Гаворка ішла не пра асістэнтаў для кодынгу, а пра галасавыя і анімэшныя чат-боты, якія даюць карыстальнікам эмацыйную падтрымку і зносіны.

Шрынівас адзначыў, што такія ШІ-суразмоўцы робяцца ўсё больш персаналізаванымі, запамінаюць мінулыя дыялогі і ўмеюць размаўляць рэалістычным чалавечым голасам.

«Гэта небяспечна па сваёй сутнасці. Многім людзям рэальнае жыццё здаецца больш сумным [чым ШІ-кампаньёны], і яны праводзяць з імі доўгія гадзіны, — папярэджвае гендырэктар. — Яны амаль цалкам жывуць у іншай рэальнасці, і іх розумам вельмі лёгка маніпуляваць».

Perplexity, па яго словах, не плануе ствараць падобных чат-ботаў. Наадварот, кампанія хоча змагацца з гэтай тэндэнцыяй, прапануючы карыстальнікам дакладныя крыніцы і кантэнт у рэальным часе. «Мы хочам працаваць на светлую будучыню», — сказаў Шрынівас.

На мінулым тыдні стартап заключыў здзелку са Snap на $400 млн — карыстальнікі Snapchat змогуць задаваць пытанні і атрымліваць адказы ад ШІ-пашукавіка Perplexity ужо ў пачатку 2026 года.

ШІ-кампаньёны становяцца адной з самых дыскутаваных і супярэчлівых сфер індустрыі. Пасля запуску Grok-4 ад xAI Ілон Маск прадставіў платных «сяброў» — анімэ-дзяўчыну Эні і панду Рудзі. Падобныя аплікацыі выпускаюць і іншыя кампаніі, уключаючы Replika і Character.AI.

Згодна з даследаваннем Common Sense Media, 72% амерыканскіх падлеткаў ужо хаця б раз размаўлялі з ШІ-кампаньёнам, а больш за палову робяць гэта рэгулярна. Крытыкі тэхналогіі папярэджваюць, што віртуальныя адносіны могуць выклікаць залежнасць, размываць эмацыйныя межы і ўзмацняць гендарныя стэрэатыпы. Але некаторыя карыстальнікі называюць узаемадзеянне з ШІ-кампаньёнамі «рэальна значным».