Алеся Чапкевич bel 10 лютага 2026, 12:20

Вялікабрытанія ўводзіць электронныя візы. Вось што зменіцца для беларусаў

Вялікабрытанія ўводзіць электронныя візы з 25 лютага. Пра абнаўленне напісала Пасольства Вялікабрытаніі ў Мінску на сваёй старонцы ў Facebook.

Пакінуць каментарый

Вялікабрытанія ўводзіць электронныя візы. Вось што зменіцца для беларусаў

Вялікабрытанія ўводзіць электронныя візы з 25 лютага. Пра абнаўленне напісала Пасольства Вялікабрытаніі ў Мінску на сваёй старонцы ў Facebook.

Усе, каму патрэбна брытанская віза, уключаючы грамадзян Беларусі, цяпер будуць замест візавай наклейкі атрымліваць толькі электронную візу eVisa.

Запаўненне анкеты анлайн і запіс на біяметрыю застаюцца ранейшымі, але наведваць Візавы цэнтр заяўнікам трэба будзе толькі адзін раз для пацвярджэння асобы. Пашпарт вернуць у дзень візіту — зноў прыходзіць за візавай налепкай не трэба.

Таксама трэба будзе стварыць уліковы запіс на сайце Упраўлення па візах і іміграцыі Вялікабрытаніі (UKVI), які дае анлайн-доступ да лічбавага іміграцыйнага статусу. Авіякампаніі, паромы, круізныя аператары і брытанская Пагранічная служба будуць аўтаматычна правяраць права на ўезд праз лічбавыя сістэмы. У пасольстве падкрэслілі, што пашпарт падарожніка павінен быць карэктна прывязаны да ўліковага запісу UKVI.

У пасце адзначаецца, што электронныя візы робяць атрыманне дазволу на ўезд хутчэй, прасцей і зручней, таму што доступ да візавых дадзеных ёсць у любы час і з любога месца. Яшчэ адзін важны аспект — бяспека: электронную візу немагчыма згубіць, скрасці ці падрабіць.