Венчурныя інвестары прадказваюць «беспрэцэдэнтны» псіхалагічны крызіс фаўндарам стартапаў
Дэфіцыт фінансавання, ціск інвестараў, акно для IPO, якое зачынілася, кліенты, што знікаюць — на фоне ўсяго гэтага многія стартапы, у якіх справы ўжо цяпер ідуць не найлепшым чынам і сканчаюцца грошы, могуць не перажыць 2024-га. Венчурныя інвестары як быццам хочуць падліць алею ў агонь, піша Business Insider: паводле іх прагнозаў, сітуацыя можа вельмі пахіснуць маральнае здароўе заснавальнікаў стартапаў у Крэмніевай даліне і не толькі, а праблема сёлета дасягне ледзь не маштабаў «эпідэміі».
«На жаль, хоць гэта не такая вялікая нечаканасць, мы, відаць, знаходзімся на парозе беспрэцэдэнтнага псіхалагічнага крызісу сярод фаўндараў», — адзначыў сузаснавальнік і генеральны партнёр інвестфірмы Primary Брэд Сврлуга, які пачаў інвеставаць у часы краху даткомаў у 2000 годзе.
У стартап-асяроддзі добра вядома аб велізарнай эмацыйнай нагрузцы на плячах фаўндараў, якім даводзіцца перажываць моцны стрэс, сумневы ў сабе і не спаць начамі. Сврлуга лічыць, што жыццё фаўндараў у перыяд спаду ў ІТ-сферы абяцае быць яшчэ менш салодкім. «Гэта зрабіла самотную працу яшчэ больш самотнай», — дадае ён.
Заснавальнікам даводзіцца ратаваць твар перад супрацоўнікамі і інвестарамі, пакуль інвестыцыі ў стартапы вычэрпваюцца. Стартапы закрываюцца або вымушаныя скарачаць штат. А паралельна — ужо некалькі гадоў працягваюцца эканамічныя цяжкасці, аддаленая праца, войны і новы цыкл прэзідэнцкіх выбараў у ЗША.
Фаўндары, з якімі размаўляў Сврлуга, скардзяцца на прыступы трывогі. «Фаўндары, якія нават у добрыя часы балансуюць на тонкай мяжы паміж магчымым і немагчымым, адчуваюць беспрэцэдэнтны ўзровень стрэсу. Паколькі сітуацыя на рынках капіталу ў 2024 годзе наўрад ці палепшыцца, баюся, што напружанне толькі павялічыцца», — дадаў інвестар.
У ім згодныя калегі з Initialized Capital. Там адзначаюць, што шмат у якіх стартапаў сканчаюцца сродкі, многія закрыюцца, але нават калі ўзнікнуць новыя магчымасці, рэалізаваць іх фаўндарам будзе складаней. У такой сітуацыі лёгка псіхалагічна зламацца і пачаць ігнараваць або адмаўляць праблемы, што даволі небяспечна.
Усё гэта фаўндарам часцяком даводзіцца вывозіць на самоце, паколькі праява слабасці падарве давер да іх каманды, праўлення і інвестараў, якія вырашаць іх замяніць. Некаторыя дазваляюць сабе раскрыць душу толькі іншым фаўндарам або сужэнцам.
Інвестары ў большасці сваёй лічаць за лепшае не чуць пра псіхалагічныя цяжкасці фаўндараў — гэтая тэма ў свеце венчурных інвестыцый свайго роду «табу». Хоць некаторыя ўсё ж ставяцца з разуменнем да фаўндараў і нават запускаюць ініцыятывы, з якіх фінансуюць для іх коўчынгавыя праграмы і сеансы псіхатэрапіі, што дапамагаюць даваць рады стрэсам і выгаранню.
Читать на dev.by