Ветэран Другой сусветнай пераехаў Tesla танкам

Мэтаю было выказаць пратэст супраць росту палітычнага ўплыву генеральнага дырэктара Tesla Ілана Маска і яго збліжэння з еўрапейскімі палітыкамі. «Аднойчы мы ўжо перамаглі фашызм, і зробім гэта зноў», — кажа на відэа былы вайсковец Кен Цёрнер. Паколькі Маск зарабляе грошы на электракарах Tesla, яму вырашылі даслаць такое пасланне. Аўтамабіль — мяркуючы па ўсім, Model 3 — са словам «фашызм» замест нумароў раздушылі танкам «Шэрман», які шырока выкарыстоўваўся падчас вайны.

Таксама ў роліку адзначаецца, што Маск выкарыстоўвае свой уплыў дзеля падтрымкі крайне правых сіл у Еўропе. Тыдзень таму ў Германіі прызналі партыю «Альтэрнатыва для Германіі», за якую заклікаў галасаваць мільярдэр, экстрэмісцкай арганізацыяй, але яна падала апеляцыю.

Дэманстрацыі супраць Маска, асабліва пасля ягоных жэстаў на інаўгурацыі Дональда Трампа, праходзяць у ЗША, Германіі, Вялікабрытаніі і іншых краінах. У Польшчы заклікі байкатаваць кампанію гучалі на ўзроўні міністраў. У Led By Donkeys адзначылі, што Маску не варта здзіўляцца такой народнай «любві».

Але і без такіх акцый кампаніі даводзіцца няпроста. У красавіку яе продажы працягнулі падаць.