Vision Pro атрымае падтрымку АІ. Apple працуе над iOS 19

Паводле звестак журналіста Bloomberg Марка Гурмана, кампанія пачала працу над асноўнымі аперацыйнымі сістэмамі, якія выйдуць у 2025 годзе. Таксама ён прывёў кодавыя назвы будучых АС: iOS распрацоўваецца пад імем Luck, macOS 16 — Cheer, watchOS — Nepali, VisionOS 3 — Discovery.

Раней на канферэнцыі WWDC 2024 была паказаная iOS 18. Пасля анонсу яна стала даступная ў бэта-версіі для распрацоўшчыкаў праграм. Першая спажывецкая бэта-версія АС стане даступная ў ліпені. Распаўсюджванне стабільнай версіі iOS 18 пачнецца восенню з запускам новых iPhone.

Таксама стала вядома, што пакет АІ-функцый Apple Intelligence стане даступны для прылад пад кіраваннем iPadOS 18, macOS Sequoia і iOS 18. Гурман сцвярджае, што кампанія актыўна працуе над укараненнем АІ-функцый у гарнітуру дапоўненай рэальнасці Apple Vision Pro.

Паводле ацэнак аналітыкаў, гарнітура можа падтрымліваць Apple Intelligence дзякуючы працэсару M2 і 16 Гбайт аперацыйнай памяці. Таксама гэта будзе лёгка і на праграмным узроўні: VisionOS з’яўляецца варыянтам iPadOS, якая ўжо прыстасаваная для працы з новымі АІ-інструментамі.