Ва ўсіх 50 штатах ЗША адбыліся акцыі пратэсту супраць Трампа і Маска. Апошняму нават у відэагульні нагадалі, што ў яго няма сяброў

Мітынгі і шэсці ахапілі ўсе 50 штатаў краіны. Сярод арганізатараў былі прафсаюзы, актывісты і праваабаронцы. Акцыі прайшлі мірна, пра затрыманні не паведамлялася.

Падобныя пратэсты супраць Трампа і Маска адбываліся і раней, але такога маштабу яны яшчэ не дасягалі. Паводле дадзеных CNN, усяго па ЗША ў гэты дзень прайшло каля 1400 акцый — у тым ліку ў горадзе Палм-Біч, непадалёк ад рэзідэнцыі Трампа, дзе ён у той момант гуляў у гольф.

Пратэстоўцы асудзілі дзеянні Трампа і Маска па скарачэнні тысяч дзяржаўных служачых, дэпартацыі мігрантаў, аслабленні абароны трансгендэрных людзей, скарачэнні фінансавання сацыяльных праграм, у тым ліку ў сферы аховы здароўя. Яны выйшлі з плакатамі «Змагайся з алігархіяй», «Рукі прэч ад нашай дэмакратыі», «Рукі прэч ад сацыяльнага забеспячэння», «Рукі прэч ад адукацыі» і «Супраціўляйся». Таксама гучалі заклікі да імпічменту Трампа і дэпартацыі Маска. Дарэчы, да законнасці знаходжання Маска ў ЗША таксама ёсць пытанні.

Пра нянавісць людзей да сябе Маск даведваецца не толькі ў рэальным свеце, але і ў віртуальным. Як піша Polygon, у тую ж суботу ён спрабаваў чарговы раз даказаць, які ён круты геймер, на стрыме гульні Path of Exile 2. Бізнесмен выйшаў у эфір з борту свайго самалёта нібыта для тэставання сеткі Starlink, але не змог перамагчы боса на этапе навучання. Некаторыя мяркуюць, што ў мільярдэра проста знікла сувязь і персанаж загінуў, а іншыя высмейвалі яго скілы.

Між тым у чаце адбывалася пекла. У каментарыях геймеры пісалі яму, што «ў яго няма сапраўдных сяброў і ён памрэ ў самоце», што ён «разбурыў краіну, як і ўсе свае шлюбы» і што ён «ніколі не будзе адчуваць сябе ў бяспецы». Некаторыя прапаноўвалі дапамагчы яму забусціць акаўнт, а хтосьці прыгадаў яму пра яго трансгендэрную дачку.