Выйшла расследаванне аб софце для сачэння за актывістамі ў сотні краін свету. Яго закупалі беларускія ўлады

Назва праграмы расшыфроўваецца як «Advanced Location Tracking and Mobile Information and Deception System» («Прасунутая сістэма адсочвання месцазнаходжання, мабільнай інфармацыі і скрыцця»). Яна дазваляе трэкаць лакацыю чалавека, аналізуе яго перамяшчэнні і перадае інфармацыю пра знаходжанне «заражаных» тэлефонаў у непасрэднай блізкасці адзін ад аднаго. З часам праграма навучылася перахопліваць званкі і паведамленні, а таксама ўзломваць уліковыя запісы ў сацсетках і месенджарах, уключаючы WhatsApp.

First Wap была заснавана аўстрыйскім эмігрантам Ёзэфам Фуксам у Інданезіі ў 1999 годзе. Пра яе дзейнасць журналісты Lighthouse Reports даведаліся дзякуючы архіву, які трапіў у іх распараджэнне ў мінулым годзе і ў асноўным датычыўся перыяду 2007–2014 гадоў.

Altamides куплялі кліенты з Беларусі, Інданезіі, Малайзіі, Нігерыі, ААЭ, Саудаўскай Аравіі, Сінгапура і Узбекістана. Кампанія адмаўляе, што наўпрост «прапаноўвала або прадавала» свае прадукты «рэпрэсіўным» рэжымам, але журналісты ўпэўнены ў адваротным.

Пад прыцэл кліентаў кампаніі трапілі палітыкі, журналісты, зоркі і актывісты ў сотні краін свету. Напрыклад, сярод мэтаў Altamides была жонка экс-прэзідэнта Сірыі Башара Асада Асма, эмір Катара шэйх Тамім бэн Хамад Аль Тані, акцёр Джарэд Лета і сузаснавальніца біятэх-кампаніі 23andMe Ганна Вайчыцкі.