«У нас кадравая памылка». Рэзідэнт ПВТ узяў на працу сісадміна пасля ўсіх сумоўяў і «звольніў» праз гадзіну
Іван (імя змененае) — сістэмны адміністратар. Нядаўна ён вырашыў змяніць працу. Усё як звычайна: убачыў вакансію, прайшоў сумоўе, атрымаў офер, адпрацаваў належны тэрмін у старой кампаніі і ў прызначаны дзень прыйшоў афармляцца ў новую — як дамаўляліся.
Але праз гадзіну яму патэлефанавалі і сказалі, што памылкова прынялі яго на працу. Вось што адбылося.
Герой матэрыялу папрасіў не называць кампаніі, якая яго наняла і праз гадзіну звольніла. Яна з’яўляецца рэзідэнтам ПВТ і распрацоўвае софт для спартыўнага бетынгу. У распараджэнні рэдакцыі ёсць скрыншоты перапіскі героя артыкула і кампаніі.
Іван працаваў у адной кампаніі сістэмным адміністратарам, але з часам прытаміўся ад звыклых задач і стэку — захацелася развіцця. Плюс на папярэднім месцы абвясцілі, што заробак у найбліжэйшай будучыні стане меншы, бо курс аплаты працы «пералічылі ў нявыгадны бок», — каментуе наш суразмоўца.
Іван пачаў шукаць новую працу — і ўбачыў на rabota.by вакансію (цяпер яна закрытая) ад кампаніі-рэзідэнта ПВТ, чыя дзейнасць звязаная са стаўкамі на спорт: ім патрэбны быў сістэмны адміністратар Linux.
Іван кажа, што ў яго быў вельмі падобны, але не ідэнтычны досвед — таму на нейкія пытанні на тэхнічным сумоўі ён не змог адказаць. І тым не менш інтэрв’ю ён прайшоў паспяхова — наступнага ж дня на пошту прыйшоў офер.
Івану спатрэбілася тры тыдні, каб завяршыць працэс звальнення ў папярэдняй кампаніі. На працягу гэтага часу ён некалькі разоў удакладняў, ці чакаюць яго ў новай. Там запэўнівалі: так, вядома. А пазней даслалі спіс дакументаў, які трэба прынесці, каб аформіцца ў штат (у рэдакцыі ёсць скрын перапіскі). Вакансію на rabota.by пры гэтым закрылі ў той жа дзень, калі Іван атрымаў офер.
— І вось момант праўды: я прыходжу ў кампанію — мяне сустракае эйчарка, прапаноўвае пазнаёміцца з камандай, скануе ўсе неабходныя для працаўладкавання дакументы (важны нюанс: дазволу на апрацоўку персанальных даных я не даваў, хоць працадаўца абавязаны яго запытаць). А затым абвяшчае: у панядзелак першы працоўны дзень, — расказвае Іван.
Радасці маёй не было краю. Але роўна праз гадзіну званок: у нас кадравая памылка, гэтая пазіцыя ўжо была закрытая, нас не папярэдзілі. Я пытаюся: «Як так?! Я дзеля гэтай пазіцыі звольніўся з бягучай працы!» У адказ толькі: «Выбачайце!»
Іван кажа, эйчарка не змагла растлумачыць яму, на якім этапе ўзнікла памылка.
— Мне сказалі, што ў іх літаральна за тыдзень усё перайгралася, на дадзеную пазіцыю людзей «дабралі» (што б гэта не значыла), але каманда нібыта не папярэдзіла HR-аддзел.
Я спытаў, ці ёсць нейкая альтэрнатыва, бо сітуацыя ў цэлым непрыгожая. Эйчарка прапанавала патэлефанаваць ліду. У размове з ім я зноў пытаўся, як так атрымалася і якое ёсць выйсце — але зразумелых адказаў не атрымаў.
Вынік — сяджу без працы.
Читать на dev.by