Wildberries прапануе грашовыя пераводы ў Беларусь і іншыя краіны

Новаўвядзенне дзейнічае з 28 чэрвеня. Даступныя пераводы ў Беларусь, Арменію, Казахстан, Кыргызстан, Таджыкістан і Узбекістан.

Паслуга ажыццяўляецца праз сэрвіс грашовых пераводаў Kwikpay. Камісія залежыць ад краіны і формы выплаты атрымальніку — наяўнымі ці на картку ў расійскіх рублях, нацыянальнай валюце або далярах ЗША. Для Беларусі яна складзе 1,5% пры выплаце пераводу атрымальніку наяўнымі ў расійскіх рублях, а з выплатай наяўнымі ў нацвалюце камісія не прадугледжана. Мінімальны і максімальны памер такіх пераводаў аднолькавы ад 100 да 400 тысяч RUB (да прыкладна 15 тысяч BYN).

Скарыстацца паслугай могуць кліенты з «максімальным» «WB Гаманцом» — для яго трэба прайсці ідэнтыфікацыю праз Дзяржпаслугі і па пашпарце.

У прэс-службе банка ўдакладнілі, што камісіі ўсталёўвае Kwikpay, а выдача грошай атрымальнікам ажыццяўляецца ў офісах партнёраў гэтай сістэмы. Зараз паслуга «працуе ў тэставым рэжыме».