X запусціў зашыфраваны месэнджар Chat замест звычайных чатаў
Сацсетка прэзентавала Chat — абноўлены месэнджар, які цалкам замяняе сістэму асабістых паведамленняў. Новы сэрвіс прапануе скразное шыфраванне, галасавыя і відэазванкі, паведамленні, што знікаюць, рэдагаванне і выдаленне адпраўленых паведамленняў, а таксама абмен файламі.
Абнаўленне ўжо даступна на iOS і ў вэб-версіі, а на Android з’явіцца «хутка», паведамілі ў кампаніі. X таксама працуе над функцыяй галасавых нататак.
Chat стаў самым маштабным абнаўленнем сістэмы паведамленняў за ўвесь час існавання платформы. Раней X запускала тэставую версію шыфраваных чатаў, але вясной прыпыніла яе з-за тэхнічных праблем. Цяпер кампанія сцвярджае, што шыфраванне распаўсюджваецца і на групавыя размовы, і на медыяфайлы.
Аднак абмежаванні застаюцца: X папярэджвае, што не абараняе ад «атак пасярэдніка» (man-in-the-middle). Гэта азначае, што ў выпадку ўмяшання злоўмысніка, унутранага супрацоўніка ці запыту спецслужб размова можа быць скампраметавана — і карыстальнікі пра гэта не даведаюцца. Кампанія абяцае пазней дадаць інструменты для праверкі сапраўднасці шыфраваных сесій.
Разам з функцыянальнымі абнаўленнямі Chat атрымаў новы інтэрфейс. Але пераход прайшоў не без крытыкі: карыстальнікі скардзяцца, што стала складаней шукаць старыя перапіскі, змяняць назвы груп і працаваць з чатам у браўзеры. Некаторыя адзначаюць, што мабільная версія працуе павольней ранейшай, і ўжо пачалі пераносіць групавыя чаты на іншыя платформы, уключаючы Discord.
Читать на dev.by