ШІ-агенты бяруць на сябе ўсё больш задач праграмістаў — ад напісання кода да праектавання сістэмаў. Інжынер Elastic Шахар Глазнер задумаўся, навошта цяпер патрэбныя распрацоўшчыкі, і выклікаў дыскусію на Hacker News.
ШІ-агенты бяруць на сябе ўсё больш задач праграмістаў — ад напісання кода да праектавання сістэмаў. Інжынер Elastic Шахар Глазнер задумаўся, навошта цяпер патрэбныя распрацоўшчыкі, і выклікаў дыскусію на Hacker News.
У эсэ «Пра працу інжынерам у 2026 годзе» Глазнер расказаў, як змянілася ягоная штодзённая праца. Спачатку ён перастаў самастойна пісаць код, потым дэлегаваў ШІ падрыхтоўку дакументаў і паведамленняў, адладку і нават частку архітэктурных рашэнняў.
«Цяпер мой працоўны дзень у асноўным складаецца з таго, што я сачу, каб мае агенты не замінялі агентам іншых людзей», — напісаў распрацоўшчык.
Пры гэтым Глазнер не лічыць, што праграмісты сталі непатрэбнымі. Паводле яго назіранняў, добрыя інжынеры па-ранейшаму дасягаюць значна лепшых вынікаў, чым сярэднія. Больш за тое, умоўныя «10x-распрацоўшчыкі» дзякуючы ШІ ператварыліся ў «100x-распрацоўшчыкаў».
Аўтар тлумачыць гэта чалавечым досведам ды інтуіцыяй. ШІ можа вырашыць пастаўленую задачу, але не заўсёды разумее, ці правільна яна сфармулявана, ці не ўскладняе ён простае рашэнне і наколькі зручна будзе падтрымліваць код праз два гады.
Эсэ выклікала бурнае абмеркаванне на Hacker News. Адныя ўдзельнікі пагадзіліся, што вопытныя інжынеры становяцца больш прадуктыўнымі. Іншыя прызналіся, што ШІ пазбавіў іхную працу задавальнення.
«Як 10x-інжынер, я зусім не ў захапленні. Я раблю з агентамі больш, чым калісь раней, але адчуваю, нібы распрацоўка страціла для мяне душу», — напісаў zeroonetwothree.
Раней ён добра ўяўляў сабе арганізацыю ўласнага кода і мог хутка знаходзіць памылкі. Цяпер яму даводзіцца пастаянна звяртацца да агентаў за тлумачэннямі і прымаць мноства дробных рашэнняў.
Іншы ўдзельнік, busssard, параўнаў новую ролю распрацоўшчыка з выхавальнікам у дзіцячым садзе, дзе выхаванцы — выключна таленавітыя дзеці.
«Мая праца, магчыма, вельмі запатрабаваная і прыносіць кампаніі рэальную карысць. Але які ў ёй сэнс, калі я ў выніку проста наглядчык?» — пажаліўся ён.
Аднак не ўсе лічаць такія змены дрэннымі. Распрацоўшчык simonw выказаў меркаванне, што найлепшыя інжынеры якраз тыя, хто працягвае разумець уладкаванне сістэмаў і цяпер можа працаваць над значна маштабнейшымі праектамі.
Іншыя нагадалі, што ШІ усё яшчэ дапускае памылкі. Напрыклад, карыстальнік popkkksidhd расказаў, як папрасіў Claude Fable 5.2 праверыць змены ў кодзе. Мадэль прыдумала дзве неіснуючыя праблемы, якія яму ўдалося заўважыць толькі дзякуючы ўласным ведам.
Сам Глазнер лічыць, што галоўная перавага чалавека — назапашаны досвед, які немагчыма цалкам перадаць у інструкцыях для ШІ. «Наша каштоўнасць не толькі ў тым, што мы ведаем, але і ва ўсім перажытым досведзе, які зрабіў нас тымі, хто мы ёсць», — заключыў ён.
Релоцировались? Теперь вы можете комментировать без верификации аккаунта.