Польскі банк адмовіўся адкрываць рахунак беларусу з ВНЖ

У банку малады чалавек абслугоўваўся апошнія 4 гады як фізасоба. У яго зарэгістравана ІП, ён атрымлівае белы заробак, плаціць падаткі і мае дзеючы ВНЖ да 2028 года. Але PKO адмовіў яму з «прычын фінансавай бяспекі».

«Калі супрацоўніца ўбачыла беларускае грамадзянства, адразу сказала, што будуць праблемы. Хаця ў мяне дзеючы ВНЖ, пашпарт, усе дакументы ў парадку. І ў мяне ўжо быў адкрыты асабісты рахунак у PKO», — кажа мужчына.

Праз дзень банк афіцыйна паведаміў пра адмову ў адкрыцці рахунку, бо ІП (які яшчэ не пачаў сваю дзейнасць) не прайшоў банкаўскую праверку бяспекі. Пры звароце на інфалінію таксама ніхто не змог выразна патлумачыць адмову.

«Адмова банка была заснавана выключна на грамадзянстве? Што гэта, калі не дыскрымінацыя?» — задаецца пытаннем айцішнік.

У выніку ён адкрыў бізнес-рахунак у Santander, а парэкамендавала яму гэта зрабіць супрацоўніца PKO. «У Santander мне адкрылі ўсё без праблем», — кажа мужчына.

У іншым аддзяленні PKO таксама не змаглі адкрыць бізнес-рахунак і сказалі прыкладна тое ж: «Беларусам не адкрываюць бізнес-рахункі». Мужчына падаў рэкламацыю і атрымаў адказ, дзе банк спасылаецца на права не ўваходзіць у адносіны з кліентам, аргументуючы гэта «прычынамі фінансавай бяспекі». Пры гэтым спасылак на канкрэтныя законы ці санкцыйныя абмежаванні ў адказе няма.

Дарэчы, нядаўна Еўракамісія растлумачыла, што санкцыі не павінны закранаць расіян і беларусаў з легальным статусам у Еўропе.

Як адзначае Złoty Dzik, у профільных групах прадпрымальнікаў Польшчы неаднаразова пісалі, што PKO рассылае дзеючым кліентам абавязковыя анкеты AML (па барацьбе з адмываннем грошай). Калі праігнараваць іх запаўненне, банк пагражае блакіроўкай рахунку.

«З пытанняў у анкеце было пра крыніцу сродкаў, ці знаходзяцца кліенты ў Польшчы, які прыблізны даход нэта ў месяц, ці ёсць рахункі ў іншых банках», — расказаў у адным з чатаў прадпрымальнік з Польшчы.

Нядаўна Камісія па фінансавым наглядзе Польшчы адказала амбудсмену па праблеме адкрыцця банкаўскіх рахункаў беларусаў у Польшчы. У дакуменце сказана, што банкі не маюць права аўтаматычна адмаўляць кліентам толькі праз грамадзянства Беларусі ці павышаных рызык па AML — кожнае рашэнне павінна прымацца індывідуальна.

Польскі Фіннагляд пракаментаваў праблемы беларусаў з адкрыццём банкаўскіх рахункаў

Па тэме

Польскі Фіннагляд пракаментаваў праблемы беларусаў з адкрыццём банкаўскіх рахункаў

Еўракамісія: санкцыі не павінны закранаць беларусаў і расіян з легальным статусам у Еўропе

Па тэме

Еўракамісія: санкцыі не павінны закранаць беларусаў і расіян з легальным статусам у Еўропе