YouTube будзе вызначаць ваш узрост самастойна, а не праз профіль

Цяпер Youtube будзе выкарыстоўваць спецыяльныя алгарытмы і аналізаваць паводзіны, каб вызначыць, ці з’яўляецца карыстальнік непаўналетнім — незалежна ад таго, якую дату нараджэння ён паказаў пры рэгістрацыі. Калі сістэма вызначае, што карыстальнік — падлетак, яму аўтаматычна актывуюцца дадатковыя меры бяспекі.

У «бяспечным» рэжыме будзе адключана персаналізаваная рэклама, абмежаваны шматразовы прагляд пэўных тыпаў відэа (напрыклад, з негатыўным уплывам на самаацэнку ці тых, што правакуюць агрэсію), а таксама ўключацца напаміны пра час экрану, час сну і інш.

Раней гэтыя меры ўжываліся толькі да тых, хто сам пацвердзіў, што яму менш за 18 гадоў, а цяпер распаўсюдзяцца і на тых, хто мог схаваць свой узрост. Калі паўналетні карыстальнік будзе памылкова вызначаны як падлетак, ён зможа пацвердзіць узрост з дапамогай банкаўскай карткі, дакумента ці сэлфі.

Першыя тэсты тэхналогіі стартуюць для абмежаванай колькасці карыстальнікаў у ЗША ў бліжэйшыя тыдні, пасля чаго сістэму плануюць укараняць шырэй. Новаўвядзенне з’явілася на фоне ўзмацнення заканадаўства па абароне дзяцей у інтэрнэце ў ЗША і Вялікабрытаніі.

Youtube адзначае, што не раскрывае дэталяў алгарытму, але аналізуе паводзіны карыстальнікаў, гісторыю актыўнасці і іншыя ўскосныя прыкметы для вызначэння ўзросту. Новая сістэма будзе працаваць толькі для аўтарызаваных карыстальнікаў на ўсіх прыладах: у браўзеры, мабільных дадатках і на тэлевізарах.