Youtube абавяжа маркіраваць АІ-кантэнт — або пакіне аўтара без манетызацыі

Відэахостынг абавяжа аўтараў паведамляць пра выкарыстанне штучнага інтэлекту для стварэння «рэалістычнага» кантэнту. Такім будуць лічыцца відэа, якія паказваюць падзеі, якія не адбываліся, або дзеянні рэальных людзей, якіх яны не здзяйснялі. Карыстальнікам прапануюць папярэдзіць гледачоў аб выкарыстанні АІ пры загрузцы відэа.

Адпаведная пазнака аб АІ будзе адлюстроўвацца ў плэеры або апісанні відэа. Платформа будзе выдаляць згенераваныя ролікі, якія дэманструюць гвалт або ўтрымліваюць шакавальныя сцэны, незалежна ад наяўнасці маркіроўкі. За сістэматычнае парушэнне правілаў кантэнт могуць выключыць з праграмы манетызацыі або выдаліць.

Цяпер кампанія працуе над інструментамі, якія дазваляюць вызначаць, ці выконваюць аўтары патрабаванні аб раскрыцці інфармацыі. Гледачы змогуць патрабаваць выдаліць створаны АІ кантэнт, калі ў роліку паказаны рэальны чалавек, уключаючы яго голас або твар. Аналагічныя запыты змогуць рабіць музычныя лэйблы.

The Verge адзначае, што пакуль незразумела, як менавіта Youtube будзе ідэнтыфікаваць немаркіраванае відэа як згенераванае АІ. Пакуль не існуе дакладных інструментаў, якія маглі б дакладна апазнаць такі кантэнт, а тыя, якія ёсць, пакутуюць на вялікую долю хібнасці. Яшчэ адзін аспект — юрыдычны, паколькі кантэнт можа быць парадыйным і сатырычным, што ахоўваецца законам.

На платформе існуюць цэлыя каналы, прысвечаныя стварэнню штучных кавераў жывых і памерлых выканаўцаў, але па новых правілах большасць з іх будзе выдаленая на просьбу лэйблаў. Адзінае выключэнне — калі кантэнт стане «прадметам навінавых рэпартажаў, аналізу або крытыкі сінтэтычнага вакалу».