За чатыры гады ІТ-рынак рэзка прасеў для выпускнікоў — меркаванне эксперта

«Нашы студэнты раней атрымлівалі па пяць прапаноў стажыровак падчас вучобы і выпускаліся з некалькімі оферамі і высокімі заробкамі. Зараз многія рады нават адной прапанове», — адзначыў Фарыд у падкасце Particles of Thought.

Ён падкрэсліў, што падзенне попыту нельга патлумачыць толькі ростам ШІ. «У індустрыі нешта адбываецца. Так, штучны інтэлект адыгрывае ролю, ёсць скарачэнні, але гэта толькі частка карціны», — сказаў навуковец.

Сітуацыю ўскладняюць новыя практыкі накшталт вайб-кодынга і ўсё больш шырокае выкарыстанне ШІ ў праграмаванні. Гэта выклікае трывогу сярод студэнтаў і выпускнікоў, якія традыцыйна разглядалі сферу ІТ як гарантаваны кар’ерны шлях.

Фарыд таксама прызнаўся, што змяніў свае парады студэнтам: замест паглыбленай спецыялізацыі ён цяпер рэкамендуе развіваць шырокі спектр навыкаў. На яго думку, будучыня патрабуе гнуткасці. «ШІ не знішчыць прафесіі, але спецыялісты, якія выкарыстоўваюць ШІ, выцесняць тых, хто яго ігнаруе», — адзначыў ён.

Паводле дадзеных The Atlantic, з 2005 па 2023 год колькасць бакалаўраў у галіне камп’ютарных навук у ЗША вырасла ў чатыры разы. Але ўжо ў 2025 годзе рост колькасці студэнтаў стабілізаваўся — некаторыя праграмы зафіксавалі спад. У 2025 годзе ўзровень беспрацоўя сярод нядаўніх выпускнікоў Computer Science дасягнуў 6,1% — самы высокі за апошнія дзесяцігоддзі.