Заробкі ў Крэмніевай даліне ўпалі больш за ўсё ў ЗША ў 2023 годзе
Ад 2022 года айцішныя кампаніі скарацілі каля 40 тысяч супрацоўнікаў у Крэмніевай даліне. З кожным раўндам звальненняў рынак становіцца ўсё менш прыветным для вызваленых спецыялістаў, становішча якіх пагаршаецца падзеннем заробкаў.
Аналітыкі нью-ёркскай арганізацыі Women Impact Tech вывучылі зарплатныя даныя па ЗША за 2020–2023 гады і пацвердзілі ўжо вядомае: кампаніі зацягваюць паясы, скарачаючы людзей і ўзнагароды. І многім людзям складана знайсці працу, якая дазваляла б забяспечыць камфортнае жыццё ў галіне заліва, піша Mercury News.
Крэмніевая даліна па-ранейшаму прапаноўвае самыя высокія заробкі ў краіне. Але менавіта тут зафіксаванае самае вялікае іх зніжэнне летась у параўнанні з 2022-м сярод тэхналагічных цэнтраў ЗША — на 15%.
У Women Impact Tech адзначаюць, што гэта мацней адбіваецца на жанчынах праз гендарны разрыў у аплаце працы. На прадстаўніц прыгожага полу прыпадае 28% усіх работнікаў ІТ-сферы. У цэлым па краіне яны атрымліваюць на 14-16% менш за калег-мужчын.
Яшчэ горшая сітуацыя ў нядаўніх выпускнікоў. Маладым спецыялістам ІТ-кампаніі хочуць плаціць усё менш — часам прапановы знаходзяцца ў раёне $60 тысяч за год. Некаторыя лічаць за лепшае з’ехаць з даліны з разлікам калі-небудзь вярнуцца.
Мясцовыя рэкруцёры кажуць, што некаторыя кампаніі плацяць супрацоўнікам ніжэй за рынак вобласці заліва, але наўзамен даюць гнуткасць — напрыклад, магчымасць працаваць аддалена і рэлакавацца ў бюджэтнейшыя месцы.
Зрэшты, адзначаюць у Women Impact Tech, сёння ці не кожная кампанія — тэхналагічная, ці то ў рытэйле, сферы гасціннасці, ці то ў іншых, таму айцішныя пазіцыі можна знайсці не толькі ў ІТ-кампаніях.
Читать на dev.by