Кітайская праграма набрала амаль 3 млн амерыканскіх карыстальнікаў за адзін дзень

Яшчэ тыдзень таму ў RedNote было прыкладна 300 тысяч амерыканскіх карыстальнікаў. Сюды масава бягуць юзеры TikTok, якія асцерагаюцца яго закрыцця ў сваёй краіне — улады ЗША бачаць у ім пагрозу нацыянальнай бяспецы. Праграмай ByteDance тут карыстаюцца 170 млн чалавек.

RedNote цяпер займае першы радок у катэгорыі бясплатных сацыяльных праграм у амерыканскім сегменце App Store.

Між тым Lemon8 — яшчэ адная сацсетка ад ByteDance — станам на панядзелак налічвала 1,7 млн штодзённых актыўных карыстальнікаў з ЗША. Тыднем раней было 1,1 млн. Амерыканская аўдыторыя TikTok напярэдадні бану ўпала на 2% у параўнанні з папярэднім тыднем да 82,2 млн штомесячных актыўных карыстальнікаў.

Многія амерыканцы ў RedNote упершыню сутыкаюцца з цэнзурай, якая дзейнічае ў кітайскіх сацсетках. Як піша vc.ru, Упраўленне ў пытаннях кіберпрасторы Кітая папярэдзіла платформу аб «неабходнасці схаваць кантэнт на англійскай ад карыстальнікаў з Кітая». Гэта звязана з пытаннямі цэнзуры — платформы павінны выдаляць кантэнт, звязаны з гвалтам, аголенай натурай, а таксама «палітычна адчувальны».

Некаторыя карыстальнікі заўважылі, што пачаткоўцам на платформе паказваецца апавяшчэнне, што іх публікацыі стануць бачныя іншым карыстальнікам толькі праз 48 гадзін. Гэта можа быць звязана з праверкай пастоў на парушэнне правілаў сацсеткі, якая стала актыўна шукаць англамоўных мадэратараў. Для праграмы паток амерыканцаў стаў нечаканасцю, паколькі яна арыентаваная на Кітай, у яе няма назвы на англійскай мове і функцыі перакладу, а большая частка змесціва цалкам на кітайскай мове.