Журналісты наведалі рабатызаваную ШІ-вытворчасць «Гарызонта»

Як адзначае выданне, «Гарызонт» з’яўляецца лідарам па вытворчасці спажывецкай электронікі ў СНД і ўваходзіць у топ-5 у Еўропе. А таксама вырабляе палову тэлевізараў на рынку ЕАЭС. У ліку кампетэнцый холдынга — распрацоўка, навучанне, праграмаванне робатаў, вытворчасць электронных модуляў, LCD-панэляў, ШІ-вырабаў, а таксама ліццё палімераў і апрацоўка металаў.

У цэнтры распрацоўкі распавялі, што «Гарызонт» стаў адкрытай вытворчай экасістэмай поўнага цыкла, якая ахоплівае ўсе этапы стварэння інавацыйных рашэнняў — ад распрацоўкі апаратнай і праграмнай часткі да масавай вытворчасці. Тут збіраюць больш за 30 відаў тэхнікі, уключаючы ноўтбукі (з 2022 года), планшэты, маніторы і міні-ПК (з 2023), святлодыёдныя экраны (з 2024), DDR і SSD, электронныя сістэмы кіравання для легкавых аўтамабіляў і іншае. R&D-цэнтр налічвае больш за 400 распрацоўшчыкаў, схематэхнікаў, прамысловых дызайнераў і праграмістаў.

Што тычыцца тэлевізараў, у «Гарызонта» ёсць уласная вытворчая база камплектуючых — пластыкавых і металічных частак, LCD-панэляў, модуляў кіравання і электронных блокаў. Выданне ўразілася эфектыўнасцю вытворчых ліній — яны дазваляюць выпускаць больш за 340 тысяч радыёэлементаў у гадзіну, або 96 у секунду. Дакладнасць пазіцыянавання кампанентаў складае каля 20 мкм. У канцы вытворчасці кампаненты праходзяць праверку пры дапамозе аўтаматычнай аптычнай 3D-інспекцыі.

У 2024 годзе «Гарызонт» выпусціў каля 3 млн тэлевізараў з дыяганаллю ад 24 да 100 цаляў. Таксама журналістам паказалі мадэль на 116 цаляў пад серыйную вытворчасць. Каля 90% тэлевізараў, што выпускаеццца, ідзе на экспарт.

Усе працэсы вытворчасці, тэставання і ўпакоўкі тэлевізараў не проста аўтаматызаваныя, але і кіруюцца ШІ. У холдынгу адзначылі, што спецыялісты прадпрыемства навучаліся і атрымлівалі сертыфікаты ў найбуйнейшых міжнародных кампаніях. Гэта дазволіла запусціць навукова-вытворчыя лабараторыі па напрамках «Робатызацыя вытворчасці» і «Інтэграцыя штучнага інтэлекту».

На заводзе амаль няма людзей — за ўсе ключавыя аперацыі адказваюць больш за 70 прамысловых робатаў і аўтаматызаваных сістэм, якія інтэграваны ў скразную сістэму лічбавага кіравання вытворчым цыклам. Завод выкарыстоўвае тэхналогіі машыннага зроку, глыбокага навучання і прэдыктыўнай аналітыкі для кожнай стадыі зборкі ад мантажу панэляў да фінальнага кантролю якасці. Гэта забяспечвае праверку каля 500 параметраў кожнага экзэмпляра тэлевізара з практычна нулявым узроўнем дэфектнасці. Самі тэлевізары таксама ідуць з нейрапрацэсарамі і ШІ-начыннем.

Таксама на прадпрыемстве задзейнічана тэхналогія «лічбавага двайніка», якая дазваляе мадэляваць вытворчыя сцэнарыі ў рэальным часе, аптымізаваць загрузку ліній і зніжаць аперацыйныя выдаткі.

Выданне робіць выснову, што «Гарызонту» ўдалося з нуля сабраць у Беларусі перадавое прадпрыемства, якое здольна канкураваць з вытворчасцямі індустрыяльных гігантаў і быць драйверам прамысловасці Беларусі.