З ІТ-кампаній звольнілі менш як 2000 чалавек за месяц — упершыню пасля 24.02

У кастрычніку з ІТ-кампаній сышло 1,9+ тысячы спецыялістаў — на 14% менш, чым у верасні.

Гэта адбіваецца на дынаміцы адтоку ІТ-спецыялістаў з галіны. З улікам стабільна невысокага (адносна леташняга) наймання адток працягвае запавольвацца. Усяго ад пачатку года ІТ-сектар скараціўся на 14,3 тысячы чалавек.

У кастрычніку ІТ-кампаніі звольнілі на 34,5% больш спецыялістаў, чым у кастрычніку мінулага года. У сёлетнім верасні ў параўнанні з леташнім розніца была +49,4%, у жніўні +53,5%, у ліпені +78,6%. І гэта таксама трэнд (зніжэнне тэмпу звальненняў у ІТ адносна 2021 года).

Пры гэтым упершыню за доўгі час за месяц з ІТ-кампаній сышло менш за дзве тысячы спецыялістаў.

Кампаніі аптымізуюць штат з улікам існых умоў. Пры гэтым, паводле інсайдарскай інфармацыі асобных спецыялістаў, у шэрагу кампаній расце колькасць супрацоўнікаў, якіх вымушана пераводзяць на бэнч. І гэта таксама ў нейкай меры ўплывае на дынаміку звальненняў у ІТ-сектары.

Найманне ІТ-кампаніям пакуль не ўдалося размарозіць. За кастрычнік яны ўзялі на працу 927 чалавек. Гэта мінімум за апошнія 5 месяцаў і на 54,5% менш, чым за леташні кастрычнік. 

Усяго за 10 месяцаў ІТ-кампаніі ўзялі на працу больш за 11 тысяч новых супрацоўнікаў — на 32% менш, чым за аналагічны перыяд мінулага года.

З ІТ-кампаній за гэты ж перыяд звольнілася 25+ тысяч спецыялістаў — на 78% больш, чым за такі ж перыяд 2021 года.

Чысты адток кадраў з ІТ-сектара за кастрычнік склаў крыху больш за тысячу спецыялістаў, за 10 месяцаў перавысіў 14 тысяч.