100 000 айцішнікаў згубілі працу з пачатку года — здагадайцеся, з-за чаго

Паводле дадзеных The Bridge Chronicle, за першыя паўгода 2025 года без працы засталіся больш за 100 000 супрацоўнікаў. Лідарам антырэйтынгу стала Intel, дзе пад скарачэнне трапілі звыш 12 000 чалавек па ўсім свеце. Кампанія пачала маштабную рэструктурызацыю: з прыходам новага CEO Ліп-Бу Тана колькасць штату была паменшана на 20%, а таксама чакаюцца новыя хвалі звальненняў.

На другім месцы — Microsoft, дзе з пачатку года звольнены больш за 10 000 супрацоўнікаў, у тым ліку ў воблачных, гульнявых і апаратных падраздзяленнях. Meta таксама скараціла каля 8 000 чалавек, нягледзячы на шчодрыя бонусы ($100 мільёнаў для новых спецыялістаў па ШІ) і будаўніцтва новых дата-цэнтраў для ШІ. Масавыя звальненні таксама прайшлі ў Amazon, Google, Salesforce і Cisco.

Эксперты адзначаюць, што многія з гэтых кампаній не маюць сур’ёзных фінансавых цяжкасцяў. Аднак пераход да ШІ, аўтаматызацыя і перагляд стратэгічных прыярытэтаў вымушаюць працадаўцаў аптымізаваць штат. Галоўнай прычынай рэструктурызацыі называюць «лішак кадраў», які ўзнік пасля агрэсіўнага набору супрацоўнікаў у пандэмію і ў чаканні росту, які не апраўдаўся пасля заканчэння абмежаванняў.

На сітуацыю ўплываюць і глабальныя эканамічныя фактары: тарыфы, уведзеныя прэзідэнтам Трампам, паўплывалі на тэхналагічны сектар, таксама ўзмацнілася гандлёвая вайна паміж ЗША і Кітаем. ІТ-кампаніі адначасова зачыняюць менш прыбытковыя праекты і скарачаюць выдаткі на персанал.

Кіраўнік Anthropic Дарыа Амадэй і CEO Ford Джым Фарлі папярэджваюць, што ШІ можа прывесці да скарачэння белых каўнерыкаў па ўсёй Амерыцы, у той час як кіраўнік Nvidia Дженсен Хуанг лічыць, што ўсё будзе залежаць ад чалавечай крэатыўнасці. Эксперты не выключаюць, што да канца года скарачэнні ў тэхналагічным сектары могуць стаць яшчэ больш маштабнымі.