Айцішнікаў з заробкам 10+ тысяч рублёў значна паменела

Белстат публікуе больш разгорнутую інфармацыю пра заробкі ў цэлым у ІКТ (не вылучаючы асобна ІТ-сектар). Для разлікаў выкарыстоўваюцца даныя пэўных кампаній.

Цікавая дэталь: у лістападзе 2022 года колькасць супрацоўнікаў у такіх кампаніях скарацілася ў параўнанні з папярэднім справаздачным перыядам (май 2022). За паўгода — мінус 15%, альбо больш за 11 тысяч спецыялістаў. 

Усяго ў кампаніях ІКТ, па якіх Белстат робіць разлікі медыяннага заробку, у лістападзе працавала 65+ тысяч чалавек — гэта мінімальная колькасць за апошнія два гады. 

Медыянны заробак айцішнікаў у лістападзе таксама выявіўся мінімальным за апошнія два гады — 3,8 тысячы рублёў. 

Падзенне медыяннага заробку айцішнікаў — вынік сыходу ІТ-кампаній, уключна з амаль усім прадуктам, рэлакейту ў тым ліку (і асабліва) высокакваліфікаваных спецыялістаў, скарачэння беларускага ІТ-сектара.

Паглядзелі, колькі спецыялістаў працуе ў ІКТ у залежнасці ад памеру заробкаў. 

Самая малалікая катэгорыя — спецыялісты з заробкам да 1000 рублёў. У лістападзе ў ІКТ-сектары іх працавала амаль 4,8 тысячы чалавек. За паўгода такіх спецыялістаў паменела на 10%, за год — на 17%. 

Большасць спецыялістаў у ІТ і сувязі атрымліваюць ад 1 да 2 тысяч рублёў — 17 тысяч чалавек. Але за паўгода (ад мая 2022) іх колькасць скарацілася на 15%.

Але больш за ўсё знізілася колькасць самых высокааплачваных ІТ-спецыялістаў, якія атрымліваюць 10 000+ рублёў на месяц (у ІКТ амаль усе працаўнікі з такім заробкам — айцішнікі). У лістападзе ў галіне іх працавала 5,5 тысяч чалавек. Гэта на 30% менш, ніж у маі 2022, і на 22% менш, ніж год таму (у лістападзе 2021). Гэта вынік рэлакацыі такіх спецыялістаў з Беларусі. 

Чакана, што доля самых высокааплачваных ІТ-спецыялістаў у ІКТ знізілася да 8,4% (паўгода таму яна была 10,4%).