Apple аштрафавалі ў ЕС на $2 млрд

Як піша Reuters, гэта першы для Apple антыманапольны штраф у ЕС. У суму ўваходзіць базавы штраф у памеры €40 млн, астатняя частка паслужыць стрымліваючым фактарам. €1,84 млрд складае ўсяго 0,5% глабальнага абароту кампаніі.

Расследаванне было распачатае пасля скаргі Spotify, пададзенай у 2019 годзе. У ЕС адзначаюць, што Apple злоўжывае дамінуючым становішчам на рынку. У прыватнасці, абмежаванні, уведзеныя ёю для распрацоўшчыкаў праграм, перашкаджаюць ім распавядаць карыстальнікам iOS аб альтэрнатыўных і больш танных музычных падпісачных сэрвісах, даступных па-за межамі яе экасістэмы. А праз камісіі для распрацоўшчыкаў падпіскі абыходзяцца карыстальнікам значна даражэй.

Абмежаванні ў краме Apple стварылі несумленныя ўмовы гандлю. Ёй загадана спыніць супрацьпраўныя практыкі.

Apple адмаўляе віну і мае намер аспрэчваць рашэнне рэгулятара. Разгляд апеляцыі можа заняць некалькі гадоў, а пакуль тэхнагігант павінен выплаціць штраф і выканаць патрабаванні еўрапейскіх уладаў.