Bloomberg: iPhone 15 выйдзе з найбуйнейшымі абнаўленнямі за тры гады

Паводле даных журналіста Bloomberg Марка Гурмана, у стандартных мадэлях iPhone 15 заменяць выраз на Dynamic Island, а дысплэі Pro і Pro Max будуць вырабленыя з дапамогай новай тэхналогіі: ліццё пры нізкім ціску, або LIPO (low-injection pressure over-molding). Яна паменшыць памер рамкі вакол дысплея да 1,5 міліметра (пры сучасных 2,2 міліметра). Гэтую тэхналогію ўпершыню выкарыстоўвалі ў Apple Watch Series 7, цяпер кампанія плануе ўкараніць яе ў iPhone і iPad.

Гурман адзначае, што новая лінейка iPhone атрымае самую вялікую колькасць абнаўленняў ад моманту дадання магчымасці падтрымкі 5G тры гады таму. Тэлефоны палепшаць камеру і чып A16, у іх заменяць цяперашні раздым Lightning на USB-C. Pro-мадэлі атрымаюць новы дызайн з выкарыстаннем тытану замест нержавеючай сталі. Унутраная частка iPhone 15 Pro будзе перапрацаваная, каб спрасціць рамонт смартфона. Таксама мадэль пяройдзе на 3-нанаметровы чып, прыкметна хутчэйшы за A16.

Яшчэ адная навіна — гэта сэнсарныя кнопкі з тактыльнай зваротнай сувяззю для рэгулявання гучнасці, пераключальніка гуку/бязгучнага рэжыму і кнопкі сілкавання. Кнопкі не будуць фізічна націскацца, гэта дазволіць скараціць колькасць кампанентаў на прыладзе, якія ломяцца. Магчыма, іх можна будзе кастамізаваць: карыстальнікі знайшлі ў кодзе iOS 17 некалькі варыянтаў выкарыстання кнопкі.