Былая топ-менеджарка крыптабіржы FTX атрымала 2 гады турмы

29-гадовая Элісан была генеральнай дырэктаркай Alameda Research, крыптавалютнага хэдж-фонду, які кантраляваў заснавальнік FTX Сэм Бэнкман-Фрыд. Элісан абвінавачвалася ў махлярстве і змове з Бэкманам-Фрыдам і некалькімі топ-менеджарамі фонду і крыптабіржы.

«Мне вельмі сорамна за тое, што я зрабіла», — сказала яна на слуханнях па прысудзе ў аўторак. Элісан пайшла на ўгоду са следствам, дала паказанні супраць Бэнкмана-Фрыда і прызнала сябе вінаватай па ўсіх пунктах абвінавачвання.

Акруговы суддзя ЗША Люіс Каплан назваў супрацоўніцтва Элісан «вельмі і вельмі істотным», што дазволіла змякчыць яе прысуд. Былая топ-менеджарка Alameda мае з’явіцца ў турму для адбівання пакарання 7 лістапада.

Раней суд прысудзіў бізнэсоўца Бэнкмана-Фрыда да 25 гадоў турмы. Яго абвінавачвалі ў разграбленні кліенцкіх рахункаў на біржы для рызыкоўных інвестыцый, атрыманні мільёнаў долараў незаконных палітычных ахвяраванняў і подкупе кітайскіх чыноўнікаў.