CEO Microsoft назваў навык, які складаней за ўсё развіць. І ён не звязаны з ІТ

«Эмпатыя — гэта не мяккі навык. Насамрэч гэты навык даецца нам цяжэй за ўсё: узаемадзейнічаць са светам, узаемадзейнічаць з самымі важнымі для нас людзьмі», — сказаў Надэла ў інтэрв’ю гендырэктару медыяканцэрна Axel Springer Маціясу Допфнеру.

Кіраўнік Microsoft падзяліўся сваёй асабістай гісторыяй — пра тое, як хвароба дзіцяці змяніла яго стаўленне да жыцця. Яго сын Заін быў паралізаваны і пакутаваў цэрэбральным паралічам. Ён памёр у лютым 2022 года ва ўзросце 26 гадоў.

«У першыя некалькі гадоў я больш знаходзіўся ў горы ад таго, што адбылося з маімі планамі. Я глядзеў на сваю жонку Ану і на тое, што яна рабіла — яна кінула працу архітэктарам і вадзіла, вазіла яго па Сіэтле на ўсе магчымыя тэрапіі. Я назіраў за гэтым і пачаў разважаць над гэтым, а потым зразумеў, што са мной нічога не адбылося. Нешта адбылося з маім сынам, і я пачаў глядзець на свет яго вачыма», — расказаў Надэла.

Гэты жыццёвы досвед перавярнуў яго ўспрыманне. «Гэта цалкам змяніла мяне як чалавека, як бацьку, мужа і кіраўніка на працы», — працягнуў Надэла.

Гендырэктар рэдмандскага тэхнагіганта не ўпершыню кажа пра важнасць эмпатыі на працы — раней ён адзначаў, што эмпатыя ў адносінах да каманды можа вельмі спрыяць кар’ернаму росту.

«Калі вы праяўляеце эмпатыю да людзей, яны будуць выкладвацца па поўнай і вы таксама будзеце расці», — адзначаў Надэла.

Таксама Надэла лічыць эмпатыю ключавым кампанентам у стварэнні інавацый: «Інавацыі — гэта пра задавальненне нездаволеных і невыказаных патрэбаў кліента. У чым іх крыніца? Хтосьці скажа, што ў дызайн-мысленні, але дызайн-мысленне і ёсць эмпатыя».

Вынікі даследаванняў таксама паказваюць, што эмпатыя — адная з галоўных лідарскіх якасцяў. 90% амерыканскіх работнікаў, апытаных у 2021 годзе экспертамі Ernst & Young, сказалі, што здольнасць менеджара да суперажывання павышае іх задаволенасць ад працы, прадукцыйнасць і лаяльнасць. Больш за палову рэспандэнтаў хоць бы раз звальнялася праз тое, што начальнікі не праяўлялі разумення да іх праблем на працы або ў асабістым жыцці.