CEO Spotify не чакаў, што калі звольніць адразу 1500 чалавек, то гэта паўплывае на працу кампаніі

«Хоць, безумоўна, гэтае рашэнне было стратэгічна правільным, яно парушыла нашую бягучую дзейнасць больш, чым мы меркавалі», — сказаў Эк. Але тут жа запэўніў, што ад моманту трансфармацыі прайшло больш за чатыры месяцы, і кампанія ўжо стабілізавалася.

Мяркуючы з усяго, звальненні сапраўды пайшлі на карысць Spotify. Платформа дала справаздачу аб прыбытку ў $210 млн па выніках 1 квартала — год таму яна зафіксавала прыкладна $241 млн страт.

Эк дадаў, што кампанія збіралася зрабіць 2024 годам манетызацыі. «Я задаволены зменамі, якія мы праводзім, і цвёрда ўпэўнены ў нашай здольнасці рэалізаваць нашыя амбіцыйныя планы», — сказаў гендырэктар Spotify.

Усяго летась сэрвіс правёў тры раўнды звальненняў, у выніку якіх без працы засталіся 2300 яго супрацоўнікаў. Эк заяўляў, што кампанія вымушаная пайсці на такі крок, бо павінна адчайна зніжаць выдаткі. У снежаньскім блогпасце ён пісаў, што занадта шмат людзей у Spotify выконваюць толькі дапаможную працу, а не сапраўдную працу, якая ўносіць рэальны ўнёсак у развіццё кампаніі. Што, аднак, не перашкаджае ёй ладзіць раскошныя вечарынкі.

У лютым СЕО Meta Марк Цукерберг таксама прызнаваў, што кампаніі было складана пасля звальненняў, і ёй было шкада расставацца з вялікай колькасцю таленавітых людзей. Але гэта зрабіла Meta беражлівейшай і эфектыўнейшай.