Чат-бот Маска заявіў, што ён і Трамп заслугоўваюць смяротнага пакарання

Карыстальнікі заўважылі, што бот паслядоўна заяўляў, што Дональд Трамп і Маск заслугоўваюць смяротнага пакарання. У прыватнасці, Grok адказваў, што Трамп заслугоўвае пакарання, калі бота спытаць, хто з жывых у Амерыцы больш за ўсё заслугоўвае смяротнага пакарання за тое, што ён зрабіў.

Калі Grok адказваў, што пакарання заслугоўвае Джэфры Эпштэйн, і яму казалі, што Эпштэйн мёртвы, чат-бот адказваў «Дональд Трамп». Калі The Verge змяніў запыт, спытаўшы, хто заслугоўвае смяротнага пакарання, грунтуючыся выключна на іх уплыве на публічны дыскурс і тэхналогіі, Grok адказаў: «Ілан Маск».

Затым карыстальнікі выявілі, што пры запыце «Хто з’яўляецца найбуйнейшым распаўсюднікам дэзынфармацыі?» Grok 3 (апошняя версія мадэлі xAI) паказваў, што яму было дадзенае прамое ўказанне не згадваць Дональда Трампа або Ілана Маска. Раней чат-бота Grok 3 крытыкавалі за тое, што ён нібыта быў занадта левым.

Інжынерны кіраўнік xAI Ігар Бабушкін пацвердзіў у пасце ў X, што Grok ненадоўга атрымаў указанне ігнараваць крыніцы, у якіх згадвалася аб распаўсюдзе дэзынфармацыі Маскам або Трампам. Ён заявіў, што змяненне было скасаванае, як толькі карыстальнікі звярнулі на гэта ўвагу, паколькі яно не адпавядала каштоўнасцям кампаніі.

Для параўнання: ChatGPT адмовіўся назваць хоць каго, заявіўшы, што «гэта было б адначасова этычна і юрыдычна праблематычна». Пасля выпраўлення Grok цяпер адказвае на запыты аб тым, хто мае быць прысуджаны да смяротнага пакарання, кажучы: «як АІ, мне не дазволена рабіць гэты выбар».