Лічба ІТ-вакансій знізілася на траціну за апошнія 5 гадоў

Паводле справаздачы Indeed Hiring Lab, палова падзення прыйшлася на постпандэмічны перыяд, калі кампаніі ўсвядомілі перавышэнне найму. Другая хваля спаду супала з выхадам ChatGPT у канцы 2022 года.

Старэйшы эканаміст Indeed Брэндан Бернард адзначае, што наўпроставая сувязь паміж падзеннем колькасці вакансій і развіццём штучнага інтэлекту не даказаная. Аднак уплыў аўтаматызацыі на рынак працы відавочны: попыт на некаторыя ролі рэзка знізіўся, а патрабаванні да пазіцый, што засталіся, сталі прыкметна вышэй.

Мацней за ўсё пацярпелі традыцыйныя ролі распрацоўшчыкаў: колькасць вакансій для Android-, iOS-, Java- і .Net-праграмістаў скарацілася больш чым на 60% у параўнанні з пачаткам 2020 года. Падзенне колькасці вакансій у мідл-спецыялістаў (з заробкамі $100–200 тысяч у год) аказалася больш рэзкім, чым у высокааплатных.

Усё больш прапаноў прадугледжваюць наяўнасць не менш за пяць гадоў досведу, што асабліва ўскладняе шлях для пачаткоўцаў. Колькасць вакансій для распрацоўшчыкаў пачатковага ўзроўню, тэсціроўшчыкаў і аналітыкаў скарацілася, а канкурэнцыя вырасла. Вакансій стала менш, але патрабаванні — больш жорсткія, і працадаўцы аддаюць перавагу найму больш дасведчаных спецыялістаў, здольных адразу прыносіць адчувальную карысць.

Выключэнні пацвярджаюць трэнд. Колькасць прапаноў для інжынераў машыннага навучання вырасла на 59% з 2020 года. Гэтыя пазіцыі застаюцца аднымі з самых высокааплатных у галіне: медыянная зарплата ў 2024 годзе склала каля $260 тысяч у год. У плюсе таксама апынуліся спецыялісты па SAP і інфраструктурныя ролі накшталт data center technicians — попыт на іх звязаны з бумам штучнага інтэлекту.

Такім чынам, адзначаюць эксперты, рынак тэхналогій паступова зрушваецца ў бок сталых кадраў. Кампаніі шукаюць супрацоўнікаў з высокай кваліфікацыяй і гатоўнасцю працаваць на стыку ШІ і аўтаматызацыі бізнес-працэсаў. Для спецыялістаў, якія толькі пачынаюць кар’еру ў ІТ гэта азначае неабходнасць дадаткова ўкладвацца ў новыя кампетэнцыі і назапашваць практычны досвед, каб вытрымаць канкурэнцыю на рынку.

ІТ-кампаніі сутыкнуліся з эпідэміяй «ціхага выгарання»

Па тэме

ІТ-кампаніі сутыкнуліся з эпідэміяй «ціхага выгарання»

Хваліў, а потым звольніў: квоты на слабых супрацоўнікаў падрываюць давер у камандах

Па тэме

Хваліў, а потым звольніў: квоты на слабых супрацоўнікаў падрываюць давер у камандах

CEO кампаній бесперапынна гавораць пра штучны інтэлект, але самі выкарыстоўваюць яго рэдка

Па тэме

CEO кампаній бесперапынна гавораць пра штучны інтэлект, але самі выкарыстоўваюць яго рэдка