Дата-цэнтры Microsoft, Meta і іншых узмацняюць засуху ў ЗША

Вада — самы танны і распаўсюджаны метад, які выкарыстоўваецца для ахалоджвання дата-цэнтраў. За адзін дзень сярэдні цэнтр апрацоўкі даных можа выкарыстоўваць 300 тысяч галонаў вады — столькі ж спажывае 100 тысяч дамоў, паводле даных даследчыкаў з Virginia Tech. Кожны пяты цэнтр апрацоўкі даных спажывае ваду з забруджаных вадаёмаў у краіне.

Напрыклад, Meta запусціла пілотную праграму ў сваіх цэнтрах Los Lunas у Нью-Мексіка, каб знізіць вільготнасць паветра ў памяшканнях ад 20% да 13% і паменшыць спажыванне вады. Пры гэтым агульнае спажыванне вады Meta расце, пятая частка гэтай вады летась паступіла з раёнаў, якія адчуваюць яе дэфіцыт. Кампанія, як і Microsoft, паставіла за мэту знізіць спажыванне вады да мінімуму не пазней за 2030 год.

«Добрая навіна палягае ў тым, што мы гадамі інвестуем у сталыя інавацыі ў гэтай галіне, так што ў прынцыпе мы можам перапрацоўваць амаль усю ваду, якую мы выкарыстоўваем у нашых цэнтрах апрацоўкі даных. У месцах, дзе ідзе дождж, такіх як ціхаакіянскі паўночны захад, у нашай штаб-кватэры ў Сіэтле мы збіраем ваду з дахаў. У месцах, дзе не бывае дажджоў, як у Арызоне, мы распрацоўваем метады кандэнсацыі», — расказаў кіраўнік Microsoft Брэд Сміт.

Цяпер у ЗША налічваецца каля 1800 цэнтраў апрацоўкі даных, і гэтая колькасць расце, паколькі цэнтры з’яўляюцца аднымі з самых запатрабаваных аб’ектаў нерухомасці ў свеце, прапаноўваючы інвестарам вялікі прыбытак. Каля 50% тэрыторыі краіны знаходзіцца ва ўмовах засухі і больш за 60% з 48 кантынентальных Штатаў.