Dell плануе скараціць дзясяткі тысяч чалавек

Каманды па продажах аб’ядноўваюць, таксама ствараецца новая група пад назвай AI Select Sales. У ходзе пераўтварэнняў «пад нож» адправяць некаторых супрацоўнікаў, але колькі — у імэйле не ўдакладняецца. Там толькі гаворыцца, што кампанія хоча «стаць эканомнейшай», «аптымізаваць іерархію кіравання» і «змяніць расстаноўку прыярытэтаў у размеркаванні інвестыцый». «Але вынік будзе таго варты: мы выйграем, і выйграем па-буйному», — заключаюць аўтары паведамлення.

Бягучыя пераўтварэнні з мэтай стаць беражлівейшымі журналістам пацвердзіў прадстаўнік Dell. Пяць звольненых з яе аддзела продажаў суразмоўцаў выдання расказалі, што працы пазбавіліся некаторыя іх калегі. У асноўным звальненні закранулі менеджараў, дырэктараў і віцэ-прэзідэнтаў, у тым ліку з больш як 20-гадовым досведам. Таксама, паводле слоў аднаго з супрацоўнікаў, скарачэнні пракаціліся па маркетынгавым і аперацыйным падраздзяленнях. Акрамя таго, менеджарам павысілі колькасць супрацоўнікаў у падначаленні: цяпер іх мае быць не менш за 15.

У кіраўніцтве Dell лічаць, што ў кампаніі «занадта шмат менеджараў сярэдняга звяна», сказала выданню крыніца, знаёмая з абмеркаваннямі ў вярхах. Ён дадаў, што «гэтым летам будуць найбуйнейшыя скарачэнні ў гісторыі», то-бок чакаюцца новыя звальненні.

Яшчэ адзін супрацоўнік Dell з HR кажа, што пасля ўсіх скарачэнняў, якія закрануць продажы, аперацыйную дзейнасць, эйчараў і «практычна ўсе падраздзяленні, за выключэннем АІ-аддзела», штат тэхнагіганта будзе меншы за 100 тысяч чалавек. Ад лютага 2023 года Dell ужо правяла некалькі раўндаў скарачэнняў, у часе якіх колькасць яе супрацоўнікаў паменшылася ад 130 тысяч да 120 тысяч.

Супрацоўнікі ад таго, што адбываецца, стаміліся і расчараваныя. «У нас звальненні кожныя паўгода. Магчымасцяў для кар’ернага росту няма. Я ўжо дзевяць месяцаў шукаю новую працу ў іншай кампаніі», — падзяліўся настроем з BI адзін з сейлзаў Dell.