10 дыпломаў, пра якія шкадуюць айцішнікі (з іх 6 — у аднаго чалавека!)

«З верталётамі справы не меў, проста запаўняў дакументы»

— Атрымаў дыплом інжынера тэхэксплуатацыі паветраных суднаў і рухавікоў у МДВАК (гэта сучасная Акадэмія авіяцыі). Цяпер бы альбо не вучыўся, а пачынаў працаваць, альбо абраў прафесію, звязаную з праграмаваннем. 

Але ў цэлым я задаволены, што атрымаў вышэйшую адукацыю. Як мінімум набыў досвед зносін з людзьмі, а таксама пошуку інфармацыі і рашэння задач. Ну і пры ўладкаванні на працу або іншых сітуацыях, калі задаюць пытанне: «Якая ў вас адукацыя?» — магу адказаць: вышэйшая. 

Паводле спецыяльнасці я прапрацаваў усяго 2 гады — на Аршанскім авіярамонтным заводзе ў Балбасаве. За першыя 6 месяцаў расчараваўся ў працы: я мог працаваць вельмі шмат, а мог зусім мала — і кіраўніцтву было ўсё адно. Апошнія паўгода адпрацоўкі я стаў вывучаць праграмаванне: прыносіў ноўтбук на працу, падключаў да манітора — і вучыўся. Працаваў вельмі мала, але ніхто гэтага нават не заўважыў. Сумна! 

Ну і праца была не тая, якую хацелася б выконваць. Хоць пасада і называлася інжынер-тэхнолаг: з верталётамі я справы не меў, проста запаўняў дзень у дзень нейкія дакументы. А самае непрыемнае: я проста пісаў тое, што казалі напісаць, або падаваў інфармацыю з дакументацыі.

«На першым курсе зразумеў: не буду працаваць сацыёлагам»

— Скончыў сацыялагічны факультэт МДУ Ламаносава ў Маскве. Яшчэ на першым курсе зразумеў, што не буду працаваць сацыёлагам, але вучыцца застаўся — дзеля дыплома. Было шкада кідаць МДУ, а сіл яшчэ год рыхтавацца да новых уступаў ужо не было. Плюс не было матывацыі, бо не ведаў, чым хачу займацца. Думаў, скончу, а там будзе відаць.

Як скончыў, працаваў у Маскве ў рэкрутменце, пакуль не пераехаў у Берлін. Там атрымаў бакалаўра ў Wirtschaftsingenieurwesen (спецыяльнасць — engineering management). Падчас навучання зразумеў, што гэты напрамак нешта мяне не задавальняе, таму паралельна пачаў і скончыў бакалаўра ў матэматыцы — таксама ў Берліне. 

Цяпер працую як data scientist і шкадую, што ад самага пачатку не зрабіў мікс з праграмавання і матэматыкі.

«Расчараваўся ў працы міліцыянтам»

— Я з радасцю паклаў на паліцу свой дыплом юрыста-прававеда Акадэміі МУС. 

Дзясятак гадоў, сярод якіх былі 5 гадоў вучобы, у выніку прывялі да таго, што я спачатку расчараваўся ў працы міліцыянтам (палачная сістэма, наплявацельскае стаўленне і поўная адсутнасць прэстыжу), а потым у 2020 годзе кінуў працу і сышоў у ІТ. І лепей бы я зрабіў гэта на 10 гадоў раней. Сорамна за тое, што робяць апошнія некалькі гадоў многія мае былыя калегі.

Што б я выбраў, калі вярнуць час назад? Кіраванне інфармацыйнымі рэсурсамі, як мінімум, або банкаўскую справу — у нашай сферы шмат хто вывучаў гэтую спецыяльнасць.

«У мяне 6 дыпломаў —і ўсе на паліцы»

— У мяне 6 дыпломаў — і ўсе на паліцы:

• аператар сувязі;
• тэхнік сувязі;
• інжынер сувязі;
• дыплом аб перападрыхтоўцы на выкладчыка спецыяльных дысцыплін у БНТУ; 
• далей дыплом магістра тэхнічных навук у БДУІР; 
• і па заканчэнні аспірантуры выдалі дыплом даследчыка.

Першыя тры атрымала стэп бай стэп у каледжы сувязі (цяпер гэта Акадэмія сувязі). Астатнія — паралельна з працай і на дзённай форме ў БНТУ і БДУІР.

Як цяпер гэта дапамагае ў ІТ — ты не пазбягаеш цяжкасцей, умееш вучыцца, асвойваць новае і адразу ўжываць на практыцы. І ўжо навучаешся не ў доўгую, а на курсах, пры гэтым адразу адсейваючы «лірыку».

Калі б вярнуць час таму, то я б вучыла англійскую мову замест французскай, якую вывучала на працягу 5 гадоў пасля школы ў каледжы сувязі.