Экс-СЕО Google: хочаце павышэнне — хадзіце ў офіс

«Калі я быў маладым топ-менеджарам, я нічога не ведаў пра тое, што раблю. Мне літаральна проста пашанцавала апынуцца там, і я вучыўся, размаўляючы ля кулера, наведваючы нарады, знаходзячыся ў памяшканні», — сказаў Шміт. Веды, атрыманыя ў выніку знаходжання ў офісе, адыгралі «ключавую» ролю ў яго далейшым павышэнні па службе. Асабліва гэта тычыцца маладых супрацоўнікаў да 30 гадоў.

Шміт кіраваў Google у 2001–2011 гадах. Цяпер ён займае пасаду тэхнічнага кансультанта Alphabet.

Паводле апытання 2 млн офісных супрацоўнікаў, праведзенага кампаніяй Live Data Technologies, за мінулы год аддаленыя працаўнікі атрымлівалі павышэнне на 31% радзей у параўнанні з калегамі на гібрыдным графіку або з тымі, хто пастаянна працуе з офіса.

Пры гэтым Шміт прызнаў, што ў некаторых галінах, паводле даследаванняў, гнуткі фармат з магчымасцю працаваць дома прыводзіў да росту прадукцыйнасці. Аднак у 2023 годзе Goldman Sachs рабіў даклад, у якім разглядаў розныя даследаванні на гэтую тэму, і высновы аўтараў розніліся — верагодна, гэта звязана з сутнасцю саміх даследаванняў і іх падыходам да вымярэння прадукцыйнасці. Аўтары аднаго даследавання са Стэнфарда зафіксавалі зніжэнне прадукцыйнасці на аддаленай працы на 10% у параўнанні са сталай працай у офісе, а вось пры гібрыдным фармаце зніжэння не назіралася.

У красавіку Шміт сцвярджаў, што праз сваю палітыку па аддаленай працы прайграе канкурэнтам у АІ, такім як OpenAI і Anthropic. «Google вырашыла, што баланс паміж працай і асабістым жыццём і сысці дадому крыху раней важнейшы за перамогу. Прычына, з якой стартапы паспяховыя, у тым, што людзі там працуюць як праклятыя», — казаў ён, дадаючы, што калі тэхнагігант хоча заставацца канкурэнтаздольным, то не мае дазваляць супрацоўнікам сядзець дома і з’яўляцца ў офісе толькі раз на тыдзень.

Са Шмітам салідарныя іншыя ІТ-топы. Ілан Маск лічыць аддаленую працу несправядлівай, Сэм Альтман называе яе «памылкай» індустрыі, а Марк Цукерберг, не падмацоўваючы сваіх слоў фактамі, сцвярджае, што аддаленыя супрацоўнікі менш прадукцыйныя. A Amazon увогуле выкарыстоўвае (не)наведвальнасць офіса як інструмент для звальненняў.