Касмічная кампанія Безаса скарачае больш за 1000 чалавек

Навіну супрацоўнікам паведаміў гендырэктар Дэйв Лімп на мітынгу 13 лютага. Паводле яго слоў, звальненні пройдуць ва ўсёй кампаніі і закрануць у тым ліку менеджараў.

Пасля сходу Лімп разаслаў імэйл, у якім адзначыў, што апошнія гады Blue Origin расла і наймала неверагодна хуткімі тэмпамі, у выніку чаго яна стала занадта грувасткай, а яе фокус занадта размыўся. Гэта выклікала неабходнасць змены аргструктуры, каб яна як мага лепш адпавядала прыярытэтам кампаніі. У сувязі з гэтым будуць скасаваныя некаторыя інжынерныя пазіцыі, а таксама пазіцыі ў R&D і кіраванні праграмамі і праектамі. Таксама прарэдзяць менеджмент.

У лісце сказана, што рашэнне аб звальненнях было прынятае старшым кіраўніцтвам па выніках распрацоўкі вытворчага плана і «стратэгіі росту» на 2025 год. Кампанія мае засяродзіцца на «хуткім, рашучым і эфектыўным» павелічэнні аб’ёмаў вытворчасці і тэмпаў запуску.

SpaceNews адзначае, што скарачэнні і іх маштаб для многіх сталі нечаканасцю. Месяц таму Blue Origin правяла паспяховы дэбютны запуск ракеты New Glenn. Кампанія ўзмацняе магутнасці па вытворчасці гэтай ракеты, працягвае выконваць запускі ракеты New Shepard і працаваць над іншымі праектамі, напрыклад, над месяцовым пасадачным модулем Blue Moon і шматмэтавай касмічнай платформай Blue Ring.