Дураў упершыню пракаментаваў сваё затрыманне ў Францыі

Паводле слоў Дурава, паліцыя дапытвала яго на працягу чатырох дзён пасля прыбыцця ў Парыж. Прадстаўнікі паліцыі сказалі, што ён можа панесці асабістую адказнасць за незаконнае выкарыстанне месенджара іншымі людзьмі, паколькі французскія ўлады не атрымлівалі адказаў ад Telegram.

«Калі краіна незадаволеная інтэрнэт-сэрвісам, устоянай практыкай з’яўляецца пачатак судовага пазову супраць самога сэрвісу. Выкарыстанне законаў эпохі да смартфонаў для абвінавачвання генеральнага дырэктара ў злачынствах, учыненых трэцімі асобамі на платформе, якой ён кіруе, з’яўляецца памылковым падыходам», — напісаў Дураў.

Бізнэсовец лічыць, што кампанія дастаткова супрацоўнічае з уладамі розных краін. «Мы імкнемся ўзаемадзейнічаць з органамі-рэгулятарамі, каб знайсці правільны баланс. Так, мы прытрымліваемся нашых прынцыпаў: наш вопыт фармуецца нашай місіяй па абароне нашых карыстальнікаў у аўтарытарных рэжымах. Але мы заўсёды былі адкрытыя для дыялогу», — дадаў ён.

«Часам мы не можам дамовіцца з органам-рэгулятарам краіны аб правільным балансе паміж прыватнасцю і бяспекай. У такіх выпадках мы гатовыя пакінуць гэтую краіну. Мы рабілі гэта шмат разоў. Калі Расія запатрабавала ад нас перадаць «ключы шыфравання» для забеспячэння сачэння, мы адмовіліся — і Telegram быў забаронены ў Расіі.

Калі Іран запатрабаваў ад нас заблакаваць каналы мірных пратэстоўцаў, мы адмовіліся — і Telegram быў забаронены ў Іране. Мы гатовыя пакінуць рынкі, несумяшчальныя з нашымі прынцыпамі, бо мы робім гэта не дзеля грошай. Намі кіруе намер несці дабро і абараняць асноўныя правы людзей, асабліва ў месцах, дзе гэтыя правы парушаюцца», — сказаў на заканчэнне прадпрымальнік.

Раней заснавальніка Telegram затрымалі 24 жніўня ў Парыжы. Прадпрымальніцу вызвалілі з-пад варты 28 жніўня пад падпіску аб нявыездзе і выставілі яму шэсць папярэдніх абвінавачванняў, звязаных у тым ліку з саўдзелам у распаўсюдзе адкрытых фота непаўналетніх асоб, збыце наркотыкаў і махлярстве. Адвакат Дурава назваў абвінавачванні «абсурднымі». Каманда месенджара заявіла, што выконвае законы ЕС і Францыі.