Дураў затрымаўся ў Францыі: ягоную справу перададуць у суд не раней як праз год

Пра гэта заявіла прадстаўніца французскай пракуратуры Майліс дэ Рэк выданню Wired. Паводле яе слоў, пакуль рана абмяркоўваць хоць нейкую міравую згоду. Журналісты адзначаюць, што бізнэсовец «затрымаўся ў Францыі», а месенджар знаходзіцца ў «падвешаным стане», чакаючы, што Дурава заменіць новы кіраўнік.

Дэ Рэк падкрэсліла, што ордар на арышт Дурава быў выдадзены пасля таго, як месенджар неаднаразова не адказваў на запыты праваахоўных органаў Францыі наконт выдачы інфармацыі, звязанай са злачынствамі. Пракуратура лічыць, што бізнэсовец вінаваты ў саўдзеле.

Раней Libération паведамляла, што ад 2013 да 2024 года было не менш за 2460 выпадкаў, калі французская жандармерыя не атрымала адказу на запыты Telegram. Кіраўніца замежных сувязяў месенджара Юлія Конлі заявіла, што лічыць «неразумным» ускладаць на Дурава адказнасць за ўсё, што адбываецца на платформе.

Дурава затрымалі ў парыжскім аэрапорце Ле Буржэ 24 жніўня 2024 года. Бізнэсоўца абвінавацілі ў злачынствах, звязаных з арганізаванай злачыннасцю, саўдзеле ў распаўсюдзе наркотыкаў і дзіцячай парнаграфіі. Дурава выпусцілі пад заклад у пяць мільёнаў еўра з абавязкам адзначацца ў паліцыі. Цяпер ён знаходзіцца ў Парыжы з забаронай пакідаць краіну.