З Беларусі сыходзяць апошнія вядомыя прадуктавікі — яшчэ 2 кампаніі

Рашэнне пра ліквідацыю прынялі ўласнікі кампаній. Gurtam афіцыйна ліквідуе кампанію ў Беларусі ад 28 лютага, Akveo — ад 9 студзеня. 

Паводле інфармацыі dev.by, яшчэ пры канцы мінулага года супрацоўнікам Akveo прапанавалі альбо рэлакавацца, альбо звольніцца

Gurtam

Беларуская ІТ-кампанія Gurtam заснаваная ў 2002 годзе. Заснавальнікі — Аляксей і Уладзімір Шчурко.

Кампанія стварыла платформу для спадарожнікавага маніторынгу і інтэрнэту рэчаў Wialon, а таксама платформу flespi для паскоранай распрацоўкі геалакацыйных рашэнняў. Да Wialon падключана больш за 3,5 мільёнаў машын і іншых аб’ектаў у 150+ краінах свету. Софт выкарыстоўваюць сотні тысяч кампаній па ўсім свеце: ад сэрвісаў па дастаўцы піцы і таксапаркаў да нафтавых карпарацый і дзяржаўных службаў.

У ліпені 2020 года ў Мінску сілавікі затрымалі дырэктара Wialon (платформы для спадарожнікавага маніторынгу і інтэрнэту рэчаў Gurtam) Аляксандра Куўшынава. Ён апынуўся ў адным аўтазаку са сваім братам Віктарам Куўшынавым — менеджарам па прадукце PandaDoc. Іх судзілі і прысудзілі да 10 і 11 сутак арышту (нібыта за парушэнне парадку). Пазней Віктар апынуўся ў СІЗА па справе PandaDoc, а Аляксандр з’ехаў з Беларусі спачатку ў Турцыю, потым ва Украіну, а пазней у Літву.

У лютым 2022 года пасля пачатку вайны ва Украіне Gurtam дала ўкраінскім кампаніям бясплатны доступ да воблачных сэрвісаў на 6+ месяцаў. У сакавіку кампанія прыпыніла продажы сваіх прадуктаў у Расіі, а ў снежні ліквідавала расійскую юрыдычную асобу.

Akveo

Кампанія ўтвораная ў 2015 годзе. Заснавальнікі — Канстанцін Даноўскі, Уладзімір Лугаўскі. Пачыналі сваю кар’еру як распрацоўшчыкі ў буйной аўтсорсінгавай кампаніі.

Akveo займаецца распрацоўкай уласных праграмных прадуктаў для вэб і мабільных рашэнняў (ngx-admin, Kitten Tricks і іншыя). Прадукты выкарыстоўваюцца ў аўтамабільнай, турыстычнай, банкаўскай, медыцынскай, тэлекамунікацыйнай і адукацыйнай галінах.

У кампаніі працуе каля 100 спецыялістаў. Асноўная каманда раней працавала ў Мінску, цяпер — у Літве і Польшчы. У прыватнасці, за мінулы і гэты год штат літоўскага офіса вырас ад 3 да 26 чалавек. У Польшчы, мяркуючы з інфармацыі з профіляў супрацоўнікаў у лінкедзіне, працуе каля 60 чалавек.

Хто ліквідуецца цяпер

Знайшлі яшчэ некалькі ІТ-кампаній, якія сышлі ў ліквідацыю сёлета.

«ПЦІ Салюшнс»

Кампанія была створаная ў кастрычніку 2020 года. Займалася распрацоўкай софту. Заснавальнік кампаніі — экс-дырэктар мінскай PandaDoc Дзмітрый Рабцэвіч. На пачатку верасня 2020 года яго разам з трыма іншымі супрацоўнікамі кампаніі затрымалі па справе PandaDoc. Пасля выхаду з СІЗА ён зарэгістраваў новую кампанію. Юрыдычны адрас «ПЦІ Салюшнс» супаў з юрыдычным адрасам PandaDoc (была ліквідаваная ў 2021). Таксама кампанія трапіла ў лік рэзідэнтаў ПВТ. 

Пра «ПЦІ Салюшнс» няма ніякай інфармацыі (штат, праекты, планы) за выключэннем сферы дзейнасці. 

«Фрэшлі Дата»

Кампанія створаная ў студзені 2019 года, была вылучаным цэнтрам распрацоўкі софту амерыканскай кампаніі Freshly. Распрацоўвала софт для аўтаматызацыі бізнэс-працэсаў у сферы электроннага гандлю з выкарыстаннем воблачных тэхналогій і штучнага інтэлекту. Ад кастрычніка 2019 года — рэзідэнт ПВТ. 

«Інэвэйт Юрап»

Кампанія была створана ў 2019 годзе як цэнтр распрацоўкі міжнароднай групы кампаній ENAVATE. Займалася стварэннем сістэм і воблачных сэрвісаў для спрашчэння і аўтаматызацыі бізнэс-працэсаў. У штаце ENAVATE каля 250 супрацоўнікаў, у Беларусі працавала каля 20 чалавек. Ад снежня 2019 года — рэзідэнт ПВТ. 

Хто ўжо сышоў

Летась здарыўся масавы сыход з Беларусі ІТ-кампаній, у тым ліку прадуктовых. Сёлета спіс працягвае папаўняцца. На дадзены момант у ім такія вядомыя кампаніі з беларускімі каранямі, як Wargaming, OneSoil, Flo, Targetprocess, Fibery, Vochi, Wannaby, Playgendary, Verv.

Хто застаўся

З вядомых прадуктовых кампаній з беларускімі каранямі ў краіне працягваюць працаваць, у прыватнасці, SayGames, Belka Games, Gismart, Easybrain, Vizor Games, Melsoft. Сярод замежных кампаній захавалі свае офісы ў Беларусі Playtika, Mapbox, Rakuten Viber, SK Hynix.

Вы выдаткавалі на гэты матэрыял дзве хвіліны. Выдаткуйце яшчэ 15 секунд, калі ласка.  

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў.

Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам часам і ўвагай. А 170 чытачоў падтрымліваюць нас данатамі. У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. Цяпер сярэдні чэк — каля 10$, але мы радыя любой суме. 

У Беларусі Patreon заблакаваны. Мы будзем дадаваць іншыя спосабы.

Дзякуй, што прачыталі гэтае паведамленне.