Джэк Дорсі запусціў размеркаваную альтэрнатыву Twitter у App Store

Праект падтрымлівае сузаснавальнік і экс-гендырэктар Twitter Джэк Дорсі. Яго распрацоўшчыкі некалькі месяцаў займаюцца стварэннем праграмы на базе ўласнага оўпэнсорснага пратакола Authenticated Transfer Protocol. Яго апісваюць як «аб’яднаную сацыяльную сетку», у рамках якой у адным хабе функцыянуюць адасобленыя сеткі.

Структура сацсеткі дазваляе пераносіць даныя ўліковых запісаў унутры Bluesky і дае карыстальніку больш кантролю над тым кантэнтам, які ён бачыць.

Праграма Bluesky стала даступная ў фармаце закрытай бэты для распрацоўшчыкаў у кастрычніку, а цяпер з’явілася ў краме Apple. Карыстальнікі могуць спампаваць яе і запісацца ў ліст чакання, каб апрабаваць яе да рэлізу для шырокай публікі.

Праект аддзяліўся ад Twitter у самастойную кампанію летась па тым, як узніклі асцярогі за яго будучыню пасля ўгоды з Іланам Маскам. Джэк Дорсі ўваходзіць у раду дырэктараў Bluesky.

У праграме ёсць укладкі хатняй старонкі, пошуку і апавяшчэнняў, а таксама функцыя рэпосту. Інфармацыі пра рэліз на Android пакуль няма.