Meta звольніла тысячы супрацоўнікаў — нават прадукцыйных. Але будзе агрэсіўна наймаць у адным кірунку

У рассылцы Марка Цукерберга з анонсам адзначалася, што ён «вырашыў падняць планку кіравання прадукцыйнасцю і хутчэй пазбаўляцца ад нізкапрадукцыйных» супрацоўнікаў.

Але пад скарачэнне трапілі нават тыя, у каго былі нядрэнныя вынікі на перфоманс-рэв’ю. Business Insider пагутарыў з 8 звольненымі супрацоўнікамі, якія атрымалі сярэдні рэйтынг у трохузроўневай сістэме ў часе прамежкавага рэв’ю летась. Па выніках гадавога рэв’ю выявілася, што яны апраўдваюць толькі «большасць» чаканняў, а гэтага недастаткова для працы ў Meta.

Пры гэтым у студзені кіраўніцтва дазволіла менеджарам уключаць у спісы на звальненне нават людзей з добрай прадукцыйнасцю, калі кандыдатаў на звальненне з ліку «недацягваючых» набралася менш за мэтавы план. Звольненыя таксама скардзіліся, што да вызначэння непрадукцыйнасці ў кампаніі падыходзяць вельмі суб’ектыўна, а таксама што іх запісалі ў гэтую групу і звольнілі несправядліва — напрыклад, яны ніколі не атрымлівалі дрэнных водгукаў пра сваю працу і не траплялі ў планы павышэння прадукцыйнасці.

Цукерберг у сваім імэйле сказаў, што кампанія запоўніць пазіцыі, якія вызваляцца, на працягу года. Але, падобна, кампанія больш зацікаўленая ў інжынерах. Віцэ-прэзідэнт па распрацоўцы тэхналогій манетызацыі Пэн Фан на карпаратыўным форуме Workplace напісаў, што ёй трэба «наняць шмат інжынераў у 2025 годзе». Фан дадаў, што Meta мае перш за ўсё закрыць крытычна важныя для бізнэсу пазіцыі і што ўпор будзе зроблены на інжынераў машыннага навучання. Найбліжэйшым часам будзе павялічанае найманне гэтых спецыялістаў, у прыватнасці, будуць праводзіцца дні інтэнсіўных сумоўяў — па тры дні на тыдзень ад 11 лютага да 13 сакавіка. Фан таксама заклікаў дапамагчы супрацоўнікаў, якія маюць адпаведную падрыхтоўку, правесці 420 сумоўяў для софтверных інжынераў, 225 паводніцкіх сумоўяў і 50 сумоўяў па распрацоўцы ML-сістэм.

У іншым пасце на Workplace кіраўнік распрацоўкі ў Instagram Нам Нгуен паведаміў, што ў сувязі з актывізацыяй наймання інтэрв’юерам трэба праводзіць па два сумоўі на тыдзень. Акрамя гэтага, плануецца нарасціць базу інтэрв’юераў на 20%.

Чёлета Meta збіраецца выдаткаваць на АІ да $65 млрд.