EPAM зноў скараціў штат і чакае меншую выручку. «Складаная сітуацыя з попытам»

Выручка кампаніі ўпала, але выйшла на ўзроўні прагнозу. Глабальны штат кампаніі скарачаецца шосты квартал запар.

Выручка

Па выніках першага квартала EPAM атрымаў выручку ў памеры 1,16 мільярда долараў. У параўнанні з аналагічным перыядам мінулага года выручка знізілася амаль на 45,5 мільёна долараў, або на 3,8%.

Паводле слоў кіраўніка кампаніі Аркадзя Добкіна, «вынікі першага квартала 2024 адлюстроўваюць узровень адаптацыі кампаніі да складанай сітуацыі з попытам». 

Пры гэтым у другім квартале EPAM пакуль не бачыць перадумоў росту кліенцкага попыту, як прагназавалася раней. У выніку кампанія перагледзела свой гадавы прагноз па выручцы.

Раней EPAM прагназаваў па выніках 2024 года нязначны рост выручкі (на 1-4%). Цяпер кампанія чакае, што выручка па выніках года знізіцца прыкладна на 1,4% да 4,57-4,67 мільярда долараў. 

У другім квартале EPAM чакае выручку ў памеры 1,13-1,14 мільярда долараў. Калі прагноз апраўдаецца, гэта будзе мінімальная квартальная выручка кампаніі ад 2022 года. 

Прыбытак

Па выніках мінулага года EPAM страціў 0,5% чыстага прыбытку або 2+ мільёны долараў. У першым квартале гэтага года аднавіўся рост чыстага прыбытку. За студзень-сакавік ён склаў 116,2 мільёна долараў — на 13,5% больш, чым за такі ж перыяд 2023 года.

Каманда EPAM

А вось глабальны штат кампаніі скарачаецца шосты квартал запар.

На канец сакавіка гэтага года ва ўсіх лакацыях EPAM працавала 52,8 тысячы спецыялістаў. За першы квартал каманда скарацілася амаль на 1%.

Штат вытворчых спецыялістаў EPAM за студзень–сакавік скараціўся ад 47,3 да 47,1 тысячы спецыялістаў. 

Кампанія не дае паквартальна падрабязнай інфармацыі пра колькасць супрацоўнікаў у асноўных лакацыях.

Каманда EPAM у Беларусі за мінулы год страціла больш за 20% супрацоўнікаў. Пры канцы 2023 года ў офісах кампаніі ў Беларусі працавала 3,5 тысячы вытворчых спецыялістаў. Апошні раз столькі вытворчых супрацоўнікаў у EPAM было 10 гадоў таму — у 2013 годзе.

Найбуйнейшы офіс кампаніі па-ранейшаму ва Украіне. Пры канцы мінулага года там працавала 9,1 тысячы вытворчых спецыялістаў. Але за 2023 год украінская каманда скарацілася амаль на 15%. 

Нязначна (на 4,5%) скарацілася за мінулы год каманда вытворчых спецыялістаў у Польшчы, якая ўваходзіць у топ-3 найбуйнейшых лакацый EPAM. Усяго ў польскіх офісах кампаніі працуе больш за 7 тысяч чалавек. 

Таксама за мінулы год зменшылася колькасць супрацоўнікаў EPAM у офісах у іншых краінах Усходняй і Заходняй Еўропы, ЗША і Канадзе, Азіі.