Ці варта вучыцца на QA за $1300+ на год — досвед чалавека, які сышоў з дзяржслужбы

— У кастрычніку мінулага года я нарэшце знайшоў у сабе сілы сысці з дзяржаўнай працы, пра што марыў апошнія гадоў сем, але ніяк не мог вырашыцца. Нейкі час адпачываў, а потым паўстала пытанне, чым займацца далей.

З 2011 года я працаваў на розных пасадах у органах дзяржаўнага кіравання і СМІ, але вяртацца ў гэтую сферу не хацелася ад слова зусім, хоць прапановы былі. І тут патрапілася падпрацоўка — аператарам чат-падтрымкі на «Яндэкс.Маркет». Як часовая занятасць — падыдзе, вырашыў я і ўжо пры канцы лістапада бадзёра адказваў кліентам пра прычыны затрымкі тавараў.

Працаваў я ў начныя змены, паміж камунікацыяй з кліентамі часу было дастаткова, і так паступова стаў падумваць аб тым, каб ажыццявіць яшчэ адну штуку, пра якую таксама даўно думаў — «увайсці ў ІТ». Каб не засыпаць вас непатрэбнымі падрабязнасцямі, скажу, што выбар мой упаў на прафесію тэсціроўшчыка — як тую, што лічыцца самай прыязнай для ўваходжання ў сферу і не патрабуе асаблівых ведаў.

Каб не памыліцца, я паспрабаваў бясплатную частку «Яндэкс.Практыкуму», і ў прынцыпе гатовы быў пайсці туды працягваць. І тут на вочы трапілася рэклама GeekBrains — і з гэтага моманту пачынаецца мая эпапея.

Пачатак

У канцы снежня 2021 я стаў студэнтам факультэта «Тэсціраванне праграмнага забеспячэння». Кошт за год — 1379 даляраў. Праграма першапачаткова планавалася такая: год разбіты на чатыры чвэрці, у кожную з якіх уваходзіць ад двух да чатырох асноўных курсаў. Таксама ёсць факультатывы на выбар і прадметы па-за чвэрцямі на жаданне (Git, «Базы даных», «Падрыхтоўка да сумоўя» і гэтак далей).

Пакуль ішлі навагоднія святы, я асвоіў некалькі ўводных лекцый, і вось 31 студзеня нарэшце пачалася асноўная частка праграмы першай чвэрці — курс «Асновы ручнога тэсціравання». Спачатку ўсё ішло добра і цікава — вэбінары працягласцю да дзвюх гадзін два разы на тыдзень (панядзелак і серада), паміж імі — выкананне хатніх заданняў, выкладчык дае зваротную сувязь — усё супер.

Падзеі 24 лютага практычна не паўплывалі на графік навучання — хутчэй, ужо мне як студэнту было не да заняткаў. Але ў цэлым на трэку лекцый гэта практычна ніяк не адбілася.

Вакацыі

На пачатку сакавіка стартаваў другі з абавязковых курсаў першай чвэрці — «Асновы тэст-аналітыкі», і вось тут стаіўся першы сюрпрыз. Куратар у чаце Тэлеграм абвясціла, што ўсіх студэнтаў з 6 да 16 сакавіка чакаюць вакацыі. Ну нічога, падумаў я, аджа якраз можна даглядзець прапушчаныя лекцыі і даздаць хатнія (у гэты момант я мяняў месца жыхарства і трохі выпаў з працэсу навучання). Так ці інакш, вакацыі прамінулі, пачаты курс у звыклым рэжыме таксама, — і тут здарыўся другі сюрпрыз.

На GeekBrains вырашылі, што вакацыі — гэта добрая практыка, і выступілі з аб’явай, што да канца года яны будуць яшчэ тройчы: 11 дзён у траўні, 10 дзён у жніўні і 10 дзён у кастрычніку–лістападзе.

Агулам — да працягласці навучання дадаўся месяц.

І з гэтым збольшага можна было б змірыцца, але далей цуды з раскладам працягнуліся.

Буткемп

У сярэдзіне красавіка другую чвэрць адкрываў абавязковы курс «Linux. Рабочая станцыя», які таксама прайшоў без эксцэсаў, калі не лічыць вакацый. 8 чэрвеня павінны быў пачацца другі асноўны курс другой чвэрці — «Тэсціраванне вэб-праграм», але тут чакаў сюрпрыз нумар тры. Забягаючы наперад, скажу, што гэты курс пачаўся толькі 20 жніўня, і вось чаму.

6 чэрвеня кіраўнікі гэтага цудоўнага партала вырашылі правесці так званы Буткемп працягласцю 45 дзён — серыю з 35 практычна штодзённых вэбінараў, мэтай якога дэкларавалі паўтарэнне пройдзенага і замацаванне навыкаў навучэнцаў. Пры гэтым на момант пачатку Буткемпа з 35 урокаў па тэмах, што я ўжо вывучыў на платформе, было 14 урокаў — астатнія былі па тэмах з курсаў, якія павінныя былі пачацца пасля Буткемпа. Вэбінары цягнуліся па 40-60 хвілін, і часцяком самі выкладчыкі сумленна прызнаваліся, што яны не ведаюць, навошта гэта прыдумалі і што з намі рабіць. Хатніх заданняў не было — лекцыі ішлі ў фармаце «паглядзелі — разбегліся».

Скончыўся Буткемп 20 ліпеня, у перыяд яго правядзення іншых курсаў не праводзілася, і гэта значыць, што да навучання дадалося яшчэ паўтара месяца. Агулам — ужо плюс два з паловай ад дамоўленага напачатку тэрміну.

Новая праграма

Адразу пасля заканчэння Буткемпа навучанне ў фармаце чвэрцяў павінна было працягнуцца, але тут зноў нешта пайшло не так. Пры канцы ліпеня на GeekBrains вырашылі, што самы час змяніць праграму! Прычым распрацавалі некалькі варыянтаў — акрамя карэкціровак у старым варыянце прыдумалі нейкую спецыялізацыю «Распрацоўшчык-Тэсціроўшчык», куды можна было перайсці бясплатна, але частку курсаў прыйшлося б праходзіць нанова.

І пакуль збіралі зваротную сувязь ад тых, хто хоча застацца на старой з карэкціроўкамі праграме, і ад тых, хто хоча перайсці на новую, што зрабілі? Правільна, аб’явілі вакацыі!

Вынік

Заканчваецца жнівень, ідзе восьмы месяц майго навучання. Профільных курсаў пакуль было ўсяго тры — кожны з 8 лекцый.

Правёўшы няхітрыя падлікі, выявім, што за час вучобы на GeekBrains на асноўнае навучанне было выдаткавана ўсяго 24 дні.

Дзеля справядлівасці скажу, што можна праходзіць і факультатыўныя курсы — я, напрыклад, вывучыў Git, «Базы даных», «Камп’ютарныя сеткі», цяпер праходжу HTML/CSS. Але ўся штука ў тым, што на курсы я пайшоў шмат у чым дзеля таго, каб камунікаваць з выкладчыкам як ужывую, так і атрымліваць зваротную сувязь па хатніх заданнях. А гэта магчыма толькі на асноўных курсах вэбінарнага фармату.

Дарэчы, тэорыю ў першай чвэрці далі вельмі нават нядрэнную, дый практыка там нічога. Я спрабаваў праходзіць сумоўі — ведаў хапае. Ды вось арганізацыя — нікуды не вартая. Калі прытрымлівацца старой праграмы, то сёння я б ужо быў у сярэдзіне трэцяй чвэрці, дзе вывучаў бы Java Core.

А замест гэтага разам з іншымі студэнтамі ў чаце мы штодня трасём куратара, каб атрымаць хоць нейкую інфармацыю.

Каб не трапіць у такую пастку, дам тэсціроўшчыкам-пачаткоўцам параду: ідзіце на YouTube. Там хапае бясплатных курсаў такога ж узроўню, і нават узроўнем вышэй. А ўжо потым будзеце прымаць рашэнне наконт далейшай вучобы.

Яўген абяцае падзяліцца выніковай часткай па заканчэнні курса, а таксама расказаць пра працэс пошуку працы ў ІТ.

ИТ-преподаватель не смог войти в айти. Пробовал самообучение, бесплатные и платные курсы

По теме

ИТ-преподаватель не смог войти в айти. Пробовал самообучение, бесплатные и платные курсы

Как войти в ИТ в 2022. Рассказывает преподаватель 10+ лет в профессии

По теме

Как войти в ИТ в 2022. Рассказывает преподаватель 10+ лет в профессии

Как управленец год пытался войти в ИТ. Не вошёл. Ушла жена-айтишница

По теме

Как управленец год пытался войти в ИТ. Не вошёл. Ушла жена-айтишница

«Айтишная зарплата — ловушка». Как после 9 лет в ИТ пробовать уйти за мечтой

По теме

«Айтишная зарплата — ловушка». Как после 9 лет в ИТ пробовать уйти за мечтой