«Гэта фарс і вымаганне»: Spotify выступіла супраць зменаў у App Store

Spotify лічыць, што ўведзены «асноўны тэхналагічны збор» (Core Technology Fee — CTF) нанясе распрацоўшчыкам шкоду, асабліва тым, хто распаўсюджвае праграмы бясплатна. На думку кампаніі, збор з’яўляецца «вымаганнем, непрыхаваным і простым». Раней Apple абвясціла, што будзе спаганяць CTF у памеры 50 еўрацэнтаў за кожную ўсталёўку праграмы звыш 1 мільёна загрузак за год.

«Мяркуючы з нашага прачытання прапановы Apple, распрацоўшчыку давядзецца плаціць гэты збор, нават калі карыстальнік загрузіў праграму, ніколі яе не запускаў і забыўся выдаліць», — гаворыцца ў паведамленні. Таксама Spotify засталася незадаволеная камісіяй у памеры 17% для распрацоўшчыкаў, якія пяройдуць на чужыя плацежныя сістэмы.

Раней Spotify абвясціла аб планах стварыць у ЕС уласную плацежную сістэму, аднак цяпер гэты праект пад пытаннем: «Улічваючы, што нашая база загрузак Apple у ЕС складае 100 млн чалавек, гэты новы падатак на загрузкі і абнаўленні можа рэзка падняць нашыя выдаткі на прыцягненне кліентаў, патэнцыйна павялічыўшы іх у дзесяць разоў. <…> Па новых умовах мы не можам дазволіць сабе гэтых збораў, калі хочам быць прыбытковай кампаніяй, так што наш адзіны варыянт — прытрымлівацца статус-кво».