«Расія практычна забрала ўсё тое, што перастала выходзіць у далёкае замежжа». Кіраўніца ПВТ пра даходы і экспарт

З пачатку года ў ПВТ дадалося больш за 100 рэзідэнтаў, прычым гэта не толькі маладыя кампаніі — каля паловы прысутнічаюць на рынку 24-25 гадоў, а самая старэйшая — з 1993 года. Зараз Парк налічвае 1050 кампаній, у іх працуе каля 60 тысяч чалавек.

Са структурай і памерам выручкі ПВТ адбываецца цікавае.

«Мы спадзяемся, што 2-мільярдны [у далярах — заўв. рэд.] экспарт у нас захаваецца. Але, скажам шчыра, што значыць, мы ўжо не толькі на экспарт засяродзімся, на выручку ў цэлым, таму што, натуральна, тэндэнцыя перацёку на ўнутраны рынак, яна змяняе структуру паказчыкаў парка. Але агульная лічба, вядома, для нас дасягальная», — сказала Рабава.

Працу на ўнутраны рынак Рабава назвала прыярытэтнай для рэзідэнтаў: «Каб усе нашы кампаніі, якія, раней, магчыма, больш працавалі на замежжа, развярнуліся тварам унутр, а нашы дзяржорганы і арганізацыі зразумелі, што ім выпадае ўнікальны шанец паспрабаваць прадукты сусветнага ўзроўню».

Усё большая доля выручкі прыходзіць з Расіі.

«Структура экспарту ў нас не моцна змяняецца. Гэта значыць у нас усё роўна асноўныя — гэта краіны Паўночнай Амерыкі, Еўропы. У нас хутчэй ідзе вось, яны практычна сталі парытэтнай з Расіяй. Калі раней тых было больш, цяпер Расія практычна забрала ўсё тое, што па нейкіх прычынах перастала выходзіць на экспарт у далёкае замежжа, — адзначыла яна. «Крышачку» ў экспарце ёсць і іншыя краіны СНД, але гэта «малыя працэнты».

Паводле слоў Рабавай, у ПВТ зарэгістравана 15 крыптарэзідэнтаў. Іх доля ў выручцы Парка невялікая, але «дэманструе зайздросныя тэмпы росту». І наогул яны прыцягваюць увагу ў свеце, прычым не толькі да сябе, але і да нашай краіны.

«Трэба сказаць, што ўсе гэтыя гады, увогуле, наладзілася праца з імі, уводзіліся дадатковая такая забяспечвальная кантрольная рэгулятарка, падтрымліваючая, каб правілы сталі цалкам празрыстымі. Ну і вось зараз можна сказаць, што гэтыя восем гадоў не прайшлі дарэмна. Мы цікавыя іншым і знешнім гульцам, і ўнутраным. Гэта значыць гэта як бы ўжо сусветная тэндэнцыя. А з прыняццем у Амерыцы двух законаў аб крыпце, уласна кажучы, зноў, гэта стала пунктам пільнай увагі і да нашага парка, і ў нашай краіне ў тым ліку. Мы атрымалі зноў у чарговы раз магчымасць заявіць пра сябе як аб прагрэсіўнай інавацыйнай краіне», — падзялілася Рабава.

Тым часам у часопісе Мінфіна «Фінансы. Улік. Аўдыт» выйшаў артыкул пра тое, што Беларусі трэба «стымуляваць вяртанне кваліфікаваных і высокакваліфікаваных спецыялістаў». «Іх не трэба адаптаваць да мясцовых рэалій, часта яны сур’ёзныя прафесіяналы. Таму аддача ад рэпатрыяцыі можа быць вышэйшай, чым ад іншаземца, нават з аналагічным узроўнем ведаў», — піша аўтар.